දේශපාලන විප්ලවයක් කැර ජනවාරි අටවැනිදා භාරගත් රටට වඩා හොඳ රටක් පස් අවුරුද්ද අවසානයේ ආපසු භාර දෙන බව තමා නිර්භයව පවසන්නේ යැයි අගමැති රනිල් වික්‍රමසිංහ මහතා ඊයේ පැවසීය.

මහින්ද රාජපක්ෂට හා කිසිදු දූෂිතයෙකුට ශ්‍රී ලනීපයෙන් නාම යෝජනා ලබා නොදෙන බව ඊයේ ජනාධිපතිවරයා , මාදුළුවාවේ සෝභිත හිමි, අගමැති රනිල් වික්‍රමසිංහ හා හිටපු ජනාධිපති චන්ද්‍රිකා බණ්ඩාරනායක හමුවේ පවසා ඇත. බණ්ඩාරනායක මහත්මියගේ ජනම දිනය අල්ලා පැවැති උත්සව අවස්ථාවකින් පසුව මේ බව ඔවුන් හමුවේ ප්‍රකාශ කොට ඇත.

මෙහිදී මෛත්‍රීපාල සිරිසේන මහතා මේ බව පැවැසූවද ජාතිය හමුවේ මේ සම්බන්ධ කිසිදු නිශ්චිත ප්‍රකාශයක් තවම සිදු නොකළේය.

පවතින දේශපාලන වාතාවරණය තුළ ශ්‍රී ලංකා නිදහස් පක්ෂයේ ජ්‍යෙෂ්ඨයන් 20 කට අධික පිරිසක් එක්සත් ජාතික පක්ෂයට එකතුවීමට සූදානමින් සිටින බව අමාත්‍ය පී. හැරිසන් මහතා සඳහන් කළේය.

එක්සත් ජනතා නිදහස් සන්ධානයෙන් මහින්ද රාජපක්ෂ මහතාට නාමයෝජනා ලබාදීමට ජනාධිපති මෛත්‍රීපාල සිරිසේන මහතා ගෙන ඇති තීරණය මෑත කාලයේ සිදුකළ ලොකුම පාවාදීම බව ජනතා විමුක්ති පෙරමුණ පවසයි.මේ නිසා එක්සත් ජනතා නිදහස් සන්ධානයට අගෝස්තු 17දා මැතිවරණයෙන් ඉතාම කණගාටුදායක ප‍්‍රතිඵලයක් ලැබෙන බවත් ජනවාරි 08වැනිදා ජනතාවගේ ඡන්දයෙන් පරාජය කළ කණ්ඩායමම නැවත වරක් මහ මැතිවරණයේ පරාජය නළලේ කොටාගෙන පැමිණෙන බවත් පැවසුවේය.

එක්සත් ජාතික පක්ෂ පාර්ලිමේන්තු මන්ත්‍රී ගයන්ත කරුණතිලක මහතා අමාත්‍ය වගකීම දරණ ජනමාධ්‍ය අමත්‍යංශය ජනාධිපති මෛත්‍රීපාල සිරිසේන මහතා යටතට ගැනීමේ උත්සාහයක් ක්‍රියාත්මක වෙමින් තිබෙන බව දේශපාලන ආරංචි මාර්ග පවසයි.

එළැඹෙන 09 වැනිදා අනුරාධපුරයේදී පැවැත්වීමට තිබූ මහින්ද සමග නැගිටීමු රැළි මාලාවේ ජන රැළිය දින නියමයක් නොමැතිව කල්දමා ඇතැයි ශ්‍රී ලංකා නිදහස් පක්ෂ අනුරාධපුර දිස්ත්‍රික් නායක එස්.එම්. චන්ද්‍රසේන මහතා පවසයි.

ජාතික හෙළ උරුමය එක්සත් ජනතා නිදහස් සන්ධානයෙන් ඉවත්වන බව එම පක්ෂයේ මහ ලේකම් ඇමති චම්පික රණවක මහතා කියා සිටියි.

අද (05) දින නිල වශයෙන් ප්‍රකාශයට පත් 'සත්හඬ' පුවත්පතට සමගාමිව 'සත්හඬ' වෙබ් අඩවියද එළිදක්වා ඇත.

'මර්වින් රිටිගල මහ කැලේ මෛත්‍රී භාවනාවේ !' යන ප්‍රධාන ශිර්ෂ පථයෙන් යුතුව 'සත්හඬ' සති අන්ත ජාතික පුවත්පත ඊයේ වෙළඳ පොලට නිකුත්කර තිබිණ.