මහින්ද රාජපක්ෂ ඇතුලු පාර්ලිමේන්තු මන්ත්‍රීවරුන් 33 දෙනෙකු ශ්‍රීලනිපය අත් හැර පොදුජන පෙරමුණේ සාමාජිකත්වය ගැනීම නිසා සිය මන්ත්‍රීධුර අහෝස් වීමේ දැඩි අවධානමකට ලක්ව තිබේ. මේ තත්වය හමුවේ තමන් කිසිවකුත් පොහොට්‍ටු පක්ෂයේ සාමාජිකත්වය නොගත්තු බවට පාර්ලිමේන්තුව හමුවේද පැවැසීමට එම කණ්ඩායමට සිදු විය.

සිරිසේන ජනාධිපතිවරයා ඊයේ පැවැති ශ්‍රිලනීප මධ්‍යම කාරක සභාවේදී ආණ්ඩු පක්ෂයට සහය දෙන ශ්‍රීලනිප මන්ත්‍රීන් 21 දෙනාට ඇමැතිකම් දැරීමට ඉඩ නොදෙන බව පවසා ඇත. එහිදී මේ වන විටත් එජාප ආණ්ඩුවට සහය දැක්වීමට ඉදිරිපත්ව සිටින විජිත් විජයමුණු සොයිසා, ඉන්දික බණ්ඩාරනායක පියසේන ගමගේ මනූෂ නානායක්කාර ඒ එච් එම් පවුසි සහ ලක්ෂ්මන් සෙනවිරත්නගේ නම් සඳහන් කරමින්ම ඔවුන්ට ඇමැතිකම් දීම තමන් අනුමත නොකරන බව පවසා ඇත.

ජනාධිපති සිරිසේන සහ මහින්ද රාජපක්ෂ එකතුව සිදු කළ ව්‍යවස්ථා විරෝධී කුමන්ත්‍රණය පරාජය කිරීමෙන් පසුව එජාප ආණ්ඩුව පිහි‍ටුවා එය ශක්තිමත් කිරීමේ මෙහෙයුමක්ද දියත් විය.

අන්ත අසරණ වී සිටින රාජපක්ෂගේ කල්ලිය අද දිනද පාර්ලිමේන්තුවේදි පරාජයට පත් විය. ඒ ශ්‍රිලනිප මන්ත්‍රිවරුන් සිව් දෙනකු අද ආණ්ඩු පක්ෂයට එක් වීමත් සමගිනි. තවත් මන්ත්‍රිවරුන් කිහිප දෙනෙකු ඉදිරි දින කිහිපයේදි ආණඩු පාර්ශ්වයට එක් වීමට නියමිතය.

ශ්‍රී ලංකාවේ අමෙරිකානු තනාපති - ඇලේනා ටෙප්ලිට්ස් ට්වීටර් පණිවිඩයක් නිකුත් කරමින් මේ සති අන්තයේ ශ්‍රී ලංකාවේ ඇති වූ ප්‍රජාතන්ත්‍රවාදි හා ව්‍යවස්ථානුකූල දේශපාලන වර්ධනය පිළිබඳ අමෙරිකාව සතුටු වෙන බව පවසනවා.

සිරිසේන ජනාධිපතිවරයා ඊයේ (16) රනිල් වික්‍රමසිංහ නව අගමැතිවරයා ලෙස පිළිගැනීම කරමින් පැවැත්තූ කතාව ගැන විවිධාකාර අදහස් පළ වෙමින් තිබේ. රනිල්ට හොඳ කණේ පාරක් ගැසුවාය රනිල්ගේ රෙදි ගැලෙව්වාය යනාදී වශයෙන් එය අගය කිරීමත් සිරිසේන අභූත චෝදනා නගමින් අන්දොනාවක් ප්‍රකාශයට පත් කළාය යනුවෙනුත් අදහස් පළවී තිබේ.