කැළණි ගඟට ඩීසල් එකතුවීම සම්බන්ධයෙන් මේවන විට කෝකාකෝලා සමාගමේ බියගම කර්මාන්ත ශාලවක කටයුතු අත්හි‍ටුවා නීතිමය පියවරයන් ගැනීමට මධ්‍යම පරිසර අධිකාරිය කටයුතු කරමින් සිටීම සතුටට කරුණකි. එමෙන්ම කැළණිගඟේ ජලයට අපද්‍රව්‍ය මිශ්‍ර කරන බවට චෝදනා ලබා තිබෙන තවත් කර්මාන්ත ශාලා කිහිපයක් සම්බන්ධයෙන්ද වහා ක්‍රියාත්මක වන ලෙස ජනාධිපතිවරයා අදාල නිළධාරීන්ට උපදෙස් දී ඇති බවද වාර්තා විය.

‘ලංකා ඊ නිව්ස්’ වෙබ් අඩවියේ ජ්‍යේෂ්ඨ මාධ්‍යවේදී ප‍්‍රගීත් එක්නැළිගොඩ මහතා පැහැරගෙන ගොස් අතුරුදන් කිරීමේ සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව විසින් සිදු කරන විමර්ශනවල දී ශ‍්‍රී ලංකා යුද හමුදාවේ බුද්ධි අංශය ව්‍යාජ එල්ටීටීඊ සංවිධානයක් පවත්වාගෙන ගොස් ඇති බව අනාවරණය වී ඇත.

එක්‌සත් ජනතා නිදහස්‌ සන්ධානයේ හවුල්කාර පක්‍ෂ හා ජාතික ආණ්‌ඩුවට සම්බන්ධ නොවන දූෂිත හා ජාතිවාදී ශ්‍රීලනිප මන්ත්‍රීවරුන් එක්‌වී අලුත් පක්‍ෂයක්‌ පිහිටුවා ගැනීමට කටයුතු කරගෙන යන බව වාර්තාවේ. මෙම පක්‍ෂය පිහිටුවා ගැනීමෙන් පසු ඔවුන් පාර්ලිමේන්තුවේ විපක්‍ෂයේ කාර්යභාරය බලහත්කාරයෙන් ඉටුකිරීමට අපේක්‍ෂා කරන බවද සඳහන් වේ.

රගර් ක්‍රීඩක තාජුඩීන්ගේ ඝාතනය සම්බන්ධයෙන් සැකකෙරෙන පුද්ගලයන් සිවුදෙනකු මේ වනවිට හඳුනාගෙන ඇතැයි අපරාධ පරික්ෂණ දෙපාර්තමේන්තුව ප්‍රකාශ කරයි.

විපක්ෂ නායක ධුරය දැරීමට ශ‍්‍රී ලංකා නිදහස් පක්ෂයට සදාචාරාත්මක අයිතියක් නොමැති බව ජනතා විමුක්ති පෙරමුණ පවසයි. එහි මධ්‍යම කාරක සභික නිහාල් ගලප්පත්ති මහතා කියා සිටියේ විපක්ෂ නායක ධුරය දැරීමට දැන් සදාචාරාත්මක මෙන්ම ව්‍යවස්ථාමය හිමිකම ඇත්තේ දෙමළ ජාතික සන්ධානයට බවය.

ලබන වසරේ මාර්තු මාසයේදී පමණ පැවැත්වීමට නියමිත පලාත්පාලන මැතිවරණයේදී මහින්ද රාජපක්ෂ මහතා වෙනම සන්ධානයකින් කණ්ඩායමක් ඉදිරිපත් කිරීමට සූදානම් වන බව ජාතික නිදහස් පෙරමුණු ආරංචි මාර්ග පවසයි.

මාධ්‍යවේදී ප්‍රගීත් එක්‌නැලිගොඩ මහතා ඝාතනය කිරීමේ සිද්ධිය සම්බන්ධයෙන් අත්අඩංගුවට ගෙන සිටින හමුදා සාමාජිකයන් සිවුදෙනා කොළඹ දෙමළ ව්‍යාපාරිකයන් පැහැර ගෙන ගොස්‌ රුපියල් කෝටි ගණනින් කප්පම් මුදල් ලබා ගැනීම් ඇතුළු සිද්ධීන් ගණනාවකට සම්බන්ධ බව පොලිසිය කළ පරීක්‍ෂණවලින් හෙළි වී ඇතැයි පොලිස්‌ ආරංචි මාර්ග දක්‌වයි. පසුගිය 2007-2008 වර්ෂවලදී මෙම පැහැරගැනීම් සහ කප්පම් ගැනීම් සිදු වී ඇති බවද අනාවරණය වී තිබේ.

යාල වනෝද්‍යානයේ හෝටල් ඉදිකිරීම රාජපක්ෂවරුන් විසින් යළිත් ආරම්භ කර තිබේ.