ඡන්ද පත්‍රිකා මුද්‍රණය ආරම්භවීමට දින කිහිපයක් තිබිය දී රජයේ මුද්‍රණාලයේ රහස්‍ය මුද්‍රණ අංශයේ ෆෝමන්වරයාට ස්ථානමාරුවීම් ලබාදීම සැක සංකා ඇති කරන තත්ත්වයක් බව කැෆේ සංවිධානය මැතිවරණ කොමසාරිස්වරයා වෙත ලිපියක් යවමින් පෙන්වාදෙයි.
ඊයේ(05) මධ්‍යම රාත්‍රියේ සිට ක්‍රියාත්මක වන පරිදි පෙට්‍රල් හා ඩීසල් ලීටරයක මිල රුපියල් 7කින්ද භූමිතෙල් ලීටරයක මිල රුපියල් 5කින්ද අඩු කිරීමට රජය තීරණය කර තිබේ.
අනුරාධපුර එප්පාවල පැවති වීදි විරෝධතා කලා ප්‍රසංගයකට ප්‍රහාරයක් එල්ල විය. ඊයේ (05 ) මධ්‍යාහ්නයෙහි එල්ල කෙරුණ ප්‍රහාරයෙන් තිදෙනෙකු තුවාල ලබා සිටිති.
මෙරට ජීවත්වන පන්ලක්ෂ හතලිස් හතර දහස් නවසිය එකොළහක් වන විශ්‍රාමික ප්‍රජාව වෙත මොබිටෙල් ආයතනය මගින් ජංගම දුරකථනයක් සහිත සිම්කාඩ්පතක් ලබාදීම ඊයේ (5) රාජ්‍ය පරිපාලන හා ස්වදේශ කටයුතු අමාත්‍ය ඩබ්ලිව්. ඩී. ජේ. සෙනවිරත්න මහතාගේ ප්‍රධානත්වයෙන් පදනම් ආයතනයේදී සිදුකෙරිණි.
හිටපු ඇමති නවීන් දිසානායක මහතාට රුපියල් මිලියන 100ක මුදලක් ලබාදීමට තැත් කළ බවට කියැවෙන ප්‍රකාශය ගැන වහා පරීක්ෂණයක් කරන්නැයි ජනපති මහින්ද රාජපක්ෂ මහතා උපදෙස් දීම තුළ ඔහුට පහලව ඇති හදිසි සත්ව කරුණාව තේරුම් ගැනීම එතරම් අපහසු නැතැයි එක්සත් ජාතික පක්ෂය මාධ්‍ය නිවේදනයක් නිකුත් කරමින් ඊයේ (05) සදහන්කර සිටියේය.
'දෙරණ' රූපවාහිනි නාළිකාවේ විකාශය වූ 'වාද පිටිය' දේශපාලන වැඩසටහන අතරතුරදීක්‍රීඩා අමාත්‍ය මහින්දානන්ද අලුත්ගමගේ මහතාට ලබා දුන් දුරකතන ඇමතුමසම්බන්ධයෙන් කටඋත්තර ලබා ගැනීම සඳහා වැඩසටහන ඉදිරිපත් කළ චතුර අල්විස් මහතා හමුවීමට විශේෂ විමර්ශන කණ්ඩායම සූදානම් වෙයි.
ශ්‍රී ලංකා ගුවන් විදුලි සේවයේ “මෛත්‍රී භාවනාව” නම් වූ වැඩ සටහන මේ වනවිට “මෙත් වඩමු” යනුවෙන් වෙනස් කොට තිබේ.
ඩබ්. ඩී. අමරදේව මහතා අද(05) දින සිය 87වන උපන්දිනය සමරයි.
ඔහු උත්තර භාරතීය රාගධාරී සංගීතයෙන් සිංහල ගීත ක්‍ෂේත්‍රය පෝෂණය කල ගෞරවණීය කලාකරුවෙකි. 1927 වර්ෂයේ දෙසැම්බර් පස් වන දින මොරටුවේදී මෙළොව එළිය දුටු, වනක්කුවත්ත මිටි වඩුගේ දොන් ඇල්බට් පෙරේරා, ප්‍රකට ගායන හා සංගීතඥයෙකු ලෙස ශ්‍රි ලංකාවේදී හඳුනා ගනු ලබන්නේ ඔහුගේ ආරෝපිත නාමය වූ අමරදේව නමිනි. සිතාරය, තබ්ලාව, හාර්මෝනියම වැනි ශාස්ත්‍රීය සංගීත භාණ්ඩ එක්කොට ගනිමින්, සිංහල ජන සංගීතය සහ භාරත ජනමූල සංගීතය ස්වකීය නිර්මාණ විෂයට දායක කර ගනී.
