මෙවර තරගාවලිය ක්‍රීඩා 36 ක තරග ඉසව් 439 ක් යටතේ යටතේ පැවැත්වෙන අතර, ශ්‍රී ලංකාවෙන් මලල ක්‍රීඩා, බොක්සිං, ක්‍රිකට් (කාන්තා/පිරිමි), හොකී, රගර්, රුවන් ඔරු, බීච් වොලිබෝල්, බර ඉසිලීම හා මල්ලවපොර යන ක්‍රීඩා ඉසව් නියෝජනය කරමින් ක්‍රීඩක ක්‍රීඩිකාවෝ 80 ක් සහභාගී වෙති.
1951 වසරේ ඉන්දියාවේ නවදිල්ලි නුවර පළමු වරට තරගාවලිය ආරම්භ වූ අතර, එතැන් සිට පැවැති සියලුම ක්‍රීඩා උලෙළවල් සඳහා ශ්‍රී ලංකාවෙන් කණ්ඩායමක් සහභාගීවී ඇත. සමස්ත ක්‍රීඩා ඉතිහාසයේ ශ්‍රී ලංකාව පදක්කම් 43 ක් (රන්-10, රිදී-11, ලෝකඩ-23) ජයග්‍රහණය කර ඇත.
කලාපීය රටවල් 46 ක් මේ වනවිට ආසියානු ක්‍රීඩා උලෙළ නියෝජනය කර ඇති අතර, ඉන් රටවල් 34 ක් එක් රන් පදක්කමක් හෝ ජයග්‍රහණය කර ඇත. ඒ හැරුණුවිට රටවල් 43 ක් අවම වශයෙන් එක් පදක්කමක් හෝ ජයග්‍රහණ කර ඇති අතර, භූතානය, මාලදිවයින හෝ ටිමෝර්-ලෙස්ටි රටවලට තවමත් එකදු පදක්කමක් ජයග්‍රහණය කිරීමට නොහැකිවී ඇත.
එමෙන්ම චීනය හා ජපානය හැරෙන්න වෙනත් කිසිදු රටකට මෙතෙක් ශූරතාව හිමිකරගැනීමට නොහැකි වී ඇත. රන් පදක්කම් 1191 ක් සමගින් සමස්ත පදක්කම් 2553 ක් (රන්-1191, රිදී-792, ලෝකඩ-570) ජයග්‍රහණය කර සිටින චීනය සමස්ත පදක්කම් සටහනේ ඉදිරියෙන්ම සිටියි.
