බොහෝවේලාවට මේ ආකාරයේ මරණය තෝරාගැනීම් වලට එහෙම නැත්තම් සියදිවි නසා ගැනීම් වලට බලපාන්නෙ මානසික රෝග. මානසික රෝග සඳහා බලපාන සමාජීය, දේශපාලනික සංස්කෘතික කරණ ඕනෑතරම අපේ සමාජයේ තියෙනවා. එවැනි කාරණාවලට විසඳුම් නොදී මරණය විසඳුමක් ලෙස ලබාදීම කොයිතරම් දුරට සාධාරණද?

 බෙල්ජියමේ වෛද්‍යවරුන් කණ්ඩායමක් අධික ආතතියෙන් පීඩා විඳින කාන්තාවකට සියදිවි නසාගැනීමේ අයිතිය ලබාදීලා තියෙනවා. බෙල්ජියම් පුවත්පතක් වන De morgan වාර්තා කරන පරිදි 24 හැවිරිදි ලෝරා නම් තරුණියක් තමන් කුඩා කාලයේ ඉඳලම විෂාදය නම් මානසික රෝගයෙන් පීඩා විඳින බැවින් තමන්ට ජීවිතය නැති කර ගැනීමට අවශ්‍ය බව ඉල්ලා තිබෙනවා.

ඇය මෙම පුවත්පතට අදහස් දක්වමින් පවසා ඇත්තේ තමන්ගේ මරණය තමන්ට විකල්පයක් නොවන බවයි. තමන්ට කිසියම් හෝ විකල්පයක් තෝරාගැනීමට තිබුණි නම් තමන් ජීවිතය තෝරාගන්නා බවත් නමුත් තමන් සිදුකළ කිසිවක් සාර්ථක නොවූ නිසා මෙම තීරණයට එළඹි බව ඇය පවසනවා.

ලෝර මේ වෙනකොට තමන්ගේ අවසන් කැමැත්ත වගේම  අවමඟුලත් සැලසුම් කර අවසන්. තමන් ස්ථාවර පවුලක ඇතිදැඩි වුවත් තමන්ගේ කුඩා කාලය මෙම තීරණය සඳහා හේතු වූ බව ඇය පවසනවා.

ලෝර මරණය පත්වන දිනය තවමත් තීරණය කර නොමැති වුවත් මෑත කාලයේ තම ජීවිතය අවසන් කරගැනීමට  උත්සහ කරන බෙල්ජියම් තරුණ පිරිස අතරට ඇයත් එක් වේ.

බෙල්ජියම 2003 වර්ෂයේදී අනයාස මරණය නීති ගත කර තිබෙනවා. අනයාස මරණය කියල අදහස කරන්නෙ යම්කිසි වේදනාවකින් හෝ විඳවීමකින් මිදීම සඳහා මරණය වැළඳ ගැනීමේ ක්‍රියාවලියයි.  එසේම ලෝකයේ බොහෝ රටවල් විවිධ රෝගාබාධවලින් පෙලෙන පුදගලයන් වෙනුවෙන් යැයි පවසා අනයාස මරණය නීති ගත කර අවසන්.

නීතිය සම්මත කිරීමෙන් අනතුරුව බෙල්ජියම තුල පමණක් වසරකට මෙවැනි මරණ 1400ක් පමණ සිදුවන බව වාර්තා වේ. එසේම බෙල්ජියම් පාර්ලිමේන්තුව 2013 වසරේ සදාකාලික රෝගාතුරව පසුවන දරුවන් වෙනුවෙන් අනායාස මරණය ක්‍රියාත්මක කිරීම නිත්‍යානුකුල කිරීමත් සමඟ මරණ ඉල්ලුම් කළ ප්‍රමාණය 1800 දක්වා වැඩි වී තිබේ.