දක්ෂිණ අධිවේගී මාර්ගයේදී නියෝජ්‍ය ඇමැති හේමාල් ගුණසේකර මහතාගේ තර්ජනයට ලක් වූ පොලිස් කොස්තාපල් සුමින්ද මහතා පොලිස් සේවයෙන් ඉල්ලා අස්වීමේ ලිපිය අද පොලිස්පති වෙත තැපෑලෙන් යවා ඇති බව වාර්තා වේ.
දක්ෂිණ අධිවේගී මාර්ගයේ සේවය කළ සුමින්ද සමන් මහතා පසුගිය මැයි මාසයේ 30 වෙනි දින ප‍්‍රහාරයකට ලක් වූ අතර, ඔහු ගමන් ගනිමින් සිටි මෝටර් රථයට ද ගිනි තබා තිබිණ.
මැයි මස 20 වෙනි දින කොට්ටාව පිවිසුමේදී සිය රියැදුරාට දඩ කොලයක් නිකුත් කිරීම සම්බන්ධයෙන් නියෝජ්‍ය අමාත්‍ය හේමාල් ගුණසේකර මහතා සහ පොලිස් කොස්තාපල් සුමින්ද සමන් මහතා අතර වාග් ප‍්‍රහාරයක් ඇති විය.
ඉන් අනතුරුව ප‍්‍රහාරය එල්ල වීම සම්බන්ධයෙන් දෙපාර්ශ්වයම අදහස් දැක්වුහ.
කෙසේවෙතත් තමන්ගේ සහ තම පවුලේ ආරක්ෂාව වෙනුවෙන් පොලිසියෙන් ඉල්ලා අස්වීමට තීරණය කළ බව සුමින්ද සමන් මහතා කියා සිටියේය.
ජනාධිපති මහින්ද රාජපක්ෂ මහතා විසින් රාජ්‍ය සේවා කොමිෂන් සභාව අරලියගහ මන්දිරයේ දී ඊයේ (1) පස්වරුවේ පත් පත්කරනු ලැබිණි.
වසර තුනක කාල සීමාවක් සඳහා බලපැවැත්වෙන මෙම කොමිසමේ සභාපතිත්වය දරන්නේ විශ්‍රාමලත් ශ්‍රේෂ්ඨාධිකරණ විනිසුරු, ජනාධිපති නීතිඥ සත්‍යා හෙට්ටිගේ මහතායි.
ආණ්ඩුක්‍රම ව්‍යවස්ථාවේ 55 වන වගන්තිය යටතේ රාජ්‍ය සේවයේ පත්වීම්, උසස් වීම්, මාරුවීම් සහ විනය පාලන කටයුතු සඳහා බලතල මෙම කොමිසම් සභාවට පැවරේ.
එස්. සී. මානප්පෙරුම, ආනන්ද සෙනෙවිරත්න, එන්.එච්. පතිරණ, එස්. තිල්ව නඩරාජා, එස්. ඒ. මොහොමඩ් නහියා, කාන්ති විජේතුංග, සුනිල් එස්. සිරිසේන, විශේෂඥ වෛද්‍ය අයි.එන්. සොයිසා ගුණසේකර මහත්ම මහත්මීහු මෙහි සෙසු සාමාජිකයෝ වෙති.
ජනාධිපති ලේකම් ලලිත් වීරතුංග, අමාත්‍ය මණ්ඩල ලේකම් සුමිත් අබේසිංහ, ජනාධිපති කාර්ය මණ්ඩල ප්‍රධානී ගාමිනී සේදර සෙනරත් මහත්වරු ද මෙම අවස්ථාවට එක්ව සිටියහ.
කොළඹ කොම්පඤ්ඤවීදියේ පිහිටි සතොස ගොඩනැගිල්ලේ හය වැනි මහලේ මුදල් හා විගණන අංශයේ පිවිසුම් දොරටුව කඩා, එම ගොඩනැගිල්ලට ගිණිතැබිම සම්බන්ධයෙන් කළ විමර්ශනවලදී චෝදනාවට ලක්වූ, අමාත්‍ය සම්බන්ධිකරණ ලේකම්වරයකුට රුපියල් එකොළොස්දහස් දෙසිය පනහක් වන්දි ගෙවන ලෙස කොළඹ කොටුව මහේස්ත්‍රාත් තිලිණ ගමගේ මහතා නියෝග කළේය.
මෙසේ වන්දි නියම වුයේ සමූපකාර හා අභ්‍යන්තර වෙළඳ කටයුතු ඇමති ජොන්ස්ටන් ප්‍රනාන්දු මහතාගේ සම්බන්ධිකරණ ලේකම්වරයකු වන දොන් පීටර් නානයක්කාරටය.
ඔහු ඊට හානි කළ බව සොයා ගැනුණේ ඔහුගේ ඇඟිලි සලකුණු තුනක් එහි සටහන් වී තිබීමෙනි.
2013 ජුලී 31 වැනිදා එම ගොඩනැගිල්ලේ ගින්නක් හටගත් බවත් ගින්නට කලින් එම දොර කඩා ඇති බවට කොම්පඤ්ඤවීදියේ පොලීසියට පැමිණිලි ලැබී ඇති බවත් අධිකරණයේදී කියැවිණි.
පොලිස් විමර්ශන වලින් පසුව මෙම පුද්ගලයාට විරුද්ධව අධිකරණ කරුණු ගොනු කර තිබූ අතර ඒ අනුව ඊයේ (30) දින ඔහුට කොළඹ කොටුව මහේස්ත්‍රාත් අධිකරණයේ පෙනී සිටින ලෙස දන්වා තිබිණ.
එම නඩුව කැඳවූ අවස්ථාවේ සතොස ගොඩනැගිල්ලේ හය වැනි මහලේ වීදුරු දොරකට අලාභ හානි සිදු කිරීම සම්බන්ධයෙන් වරදකරු වී ඇති නිසා රුපියල් එකොළොස්දහස් දෙසිය පනහක් වන්දි ගෙවන ලෙස කොළඹ කොටුව මහේස්ත්‍රාත් තිලිණ ගමගේ මහතා ඔහුට නියෝග කළේය.
මෙම ගින්නෙන් විනාශවී ඇති භාණ්ඩ අතර වංචා දූෂණ ලිපිගොනු සහ ඒ පිළීබඳ ඇති වෙනත් ලිපි ලේඛණ, සේවකයන්ගේ විනය ප්‍රශ්න සම්බන්ධයෙන් ගනු ලැබූ තීන්දු තීරණ හා එහි සාක්ෂි සටහන් සියල්ලද විනාශ වී ඇත.
මෙම ගින්න හේතුවෙන් අමාත්‍යංශය ලැබූ පාඩුව මිලියන ගණනක් බවත් පැවසේ.
දෙපාර්ශවයේම එකඟත්වයෙන් සිද්ධිය සමථකට පත් විය.
විදුලිබල මණ්ඩලයේ ප්‍රමිතීන්ට අනුකූල නොවු තෙල් තොගයක් ගොඩබා ගැනීම ප්‍රතික්ෂේප කළ බව ලංකා ඛනිජ තෙල් නිතිගත සංස්ථාව පවසයි.
එහි සභාපති සිරිසේන අමරසේකර මහතා ප්‍රකාශ කළේ අබුඩාබි සිට ආනයනය කළ අදාළ තෙල් තොගය වෙනුවට වෙනත් තෙල් තොගයක් ලබාදීමට නියමිත බවයි.
මෙම තෙල් තොගය නැවත හරවා යාම හේතුවෙන් විදුලිබල මණ්ඩලයට තෙල් හිඟයක් මතු වීමේ අවදානමක් නොමැති බව ද සභාපතිවරයා සඳහන් වැඩිදුරටත් සඳහන් කළේය.
වහාම ක්‍රියාත්මකවන පරිදි ශ්‍රී ලංකා ක්‍රිකට් ආයතනයේ සභාපති ජයන්ත ධර්මදාස මහතා ආසියානු ක්‍රිකට් කවුන්සිලයේ සභාපති ධුරයට පත් කර තිබේ.
නිවේදනයක් නිකුත් කරන ශ්‍රී ලංකා ක්‍රිකට් ආයතනය පවසන්නේ ජයන්ත ධර්මදාස මහතා මෙම ධුරයට පත් දෙවන අවස්ථාව මෙය බව ය.
මීට පෙර වර්ෂ 2012 සිට ආසියානු ක්‍රිකට් කවුන්සිලයේ සභාපති ධුරයේ කටයුතු කරනු ලැබුවේ එන්. සිරිනිවාසන් මහතා ය.
සිරිනිවාසන් මහතා පසුගියදා ජාත්‍යන්තර ක්‍රිකට් කවුන්සිලයේ සභාපතිවරයා ලෙස පත් කරනු ලැබිණි.
අඛණ්ඩව වැසි ඇඳ හැළුණහොත් නුවරඑළිය, මහනුවර, රත්නපුර, කෑගල්ල සහ කළුතර දිස්ත්‍රික්කවල නායයෑමේ අවදානමක් පවතින බව ගොඩනැගිලි පර්යේෂණ සංවිධානය පවසයි.
මේ අතර, කාලගුණ විද්‍යා දෙපාර්තමේන්තුව පවසන්නේ, ඉදිරි පැය 24 තුළ දිවයිනේ නිරිත දිග කොටසේ වැසි වැඩි වීමට සහ දිවයින සහ අවට මුහුදු ප්‍රදේශවල නිරිතදිග මෝසම් සුළං වේගය විටින් විට පැ.කි.මී.70-80පමණ දක්වා වැඩි වීමට ඉහළ හැකියාවක් පවතින බවයි.
දිවයිනේ බස්නාහිර,සබරගමුව සහ මධ්‍යම පළාත් වලත් ගාල්ල සහ මාතර දිස්ත්‍රික්ක වලත් විටින් විට වැසි හෝ ගිගුරුම් සහිත වැසිඇතිවේ. ඇතැම් ස්ථාන වලත්ද වැසි (මි.මි 100 පමණ)ද ඇති වියහැකිය.
එසේම මන්නාරම සිට කොළඹ සහ ගාල්ල හරහාපොතුවිල් දක්වා වන ගැඹුරු සහ නොගැඹුරු මුහුදු ප්‍රදේශ වලසුළං වේගය විටින් විටපැ. කි. මී.80 පමණ දක්වා ඉහල යා හැකිය.
එබැවින් එම මුහුදු ප්‍රදේශ විටින් විට රළු විය හැකි බැවින් ඒ පිළිබඳව විමසිලිමත් වන ලෙස ධීවර සහ නාවික ප්‍රජාවට කාලගුණ විද්‍යා දෙපාර්තමේන්තුවෙන් දැනුම් දීමක් කරනු ලැබේ.
ඛනිජ තෙල් කර්මාන්ත ඇමැති අනුර ප්‍රියදර්ශන යාපා මහතා ගමන් කළ මෝටර් රථය ඊයේ (30 දා) උදේ පයාගල බණ්‌ඩාරනායක විද්‍යාලය අසල ගාලු පාරේදී යතුරුපැදියක ගැටීමෙන් යතුරු පැදියේ ගමන් කළ මවක හා පුතකු තුවාල ලබා ප්‍රතිකාර සඳහා කළුතර නාගොඩ රෝහලට ඇතුළත් කර ඇත.
අනතුරින් තුවාල ලැබුවේ හීනටියන්ගල ගාල්ල පදිංචි විඡේසිංහ ගමආරච්චිගේ විජිත් වික්‍රමතිලක (19) පුතා සහ චින්තා කනකරත්න (46) මව යන දෙදෙනායි. ජනාධිපති ප්‍රධානත්වයෙන් බේරුවල මොරගල්ල සිනමන් බේ සංචාරක හෝටලයේ පැවැත්වෙන වැඩමුළුවකට සහභාගිවීමට යමින් සිටියදී ඇමැතිවරයා ගමන් කළ මෝටර් රථය මෙසේ අනතුරට ලක්‌විය.
ගාල්ල දෙස සිට කොළඹ දෙසට ධාවනය වූ යතුරුපැදියේ ඇමැතිවරයාගේ නිල රථය ගැටී මෙම අනතුර සිදුවී ඇත. වම් පසින් ධාවනය කළ යුතු ඇමැතිවරයාගේ නිල රථය මාර්ග නීති කඩ කරමින් දකුණු පසින් ධාවනය කර ඇතැයි ද පොලිසිය පවසයි.
ඇමැතිවරයාගේ මෝටර් රථය සහ රියදුරු පයාගල පොලිසිය විසින් අත්අඩංගුවට ගෙන ඇති අතර රියදුරු ඊයේ අධිකරණයට ඉදිරිපත් කිරීමට නියමිතව තිබිණි.
ශ්‍රී ලංකා නිදහස් පක්ෂයේ සියලුම ඇමැතිවරු පාර්ලිමේන්තු හා පළාත් සභා මන්ත්‍රිවරු අද (30දා) පෙරවරුවේ බේරුවල සිනමන් සිටි හෝටලයට රැස්වෙති. ඒ ඉදිරියේ පැවැත්වීමට නියමිත ජනාධිපතිවරණය ඇතුළු ජාතික මට්ටමේ මැතිවරණ පිළිබඳ රජයේ ඉදිරි දේශපාලන වැඩපිළිවෙළ ජනතාව අතරට ගෙනයෑම පිළිබඳ දැනුම්වත් කිරීම සඳහා ජනාධිපති මහින්ද රාජපක්ෂ මහතාගේ ප්‍රධානත්වයෙන් පැවැත්වෙන විශේෂ වැඩසටහනකට සහභාගි වීමටය.
ශ්‍රී ලංකා නිදහස් පක්ෂය මේ දිනවල සිය පක්ෂ සංවිධානය, ආසනබල මණ්ඩල දේශපාලන වශයෙන් ශක්තිමත් කිරීමේ වැඩ සටහනක යෙදී සිටී.
මේ දිනවල ආණ්ඩුවේ ඇතැම් ඇමැතිවරුන් ප්‍රසිද්ධියේ එකිනෙකා විවේචනය කර ගනිමින් කෙරෙන ප්‍රකාශ හා අනියමින් ආණ්ඩුවේ ඇතැම් ක්‍රියාකාරකම් සියුම් ලෙස විවේචනය කිරීම සම්බන්ධයෙන්ද මේ වැඩසටහනේදී ජනාධිපතිවරයා කරුණු දැක්වීමක් කරණු ඇතැයිද අපේක්ෂා කෙරේ.
කෙසේ නමුත් පසුගියදා එක්සත් ජාතික පක්ෂයේ නායකත්ව මණ්ඩලය හා තවත් පිරිසක් කොළඹ හෝටලයකට රැස්වී ඉදිරි දේශපාලන ක්‍රියා මාර්ග සම්බන්ධයෙන් සකච්ඡා කිරීම ගැන ආණ්ඩුවේ ඇතැම් මැති ඇමැතිවරුන් අතින් විවේචනය වුයේ සිරිකොත මුලස්ථානය තිබියදී හෝටල්වලට රැස්වී රහස් කතා පවත්වන බව කියමිනි.
