තොරතුරු දැනගැනීමේ අයිතිය සුරක්ෂිත කරවීම පිළිබඳ බොහෝ සංවාදයන් පසුගිය සමයේ පැනනැඟී තිබුණු වාතාවරණයක් තුළ වයඹ පළාත් සභාවේ මෙම හැසිරීම තමුන් තෝරාපත් කළ ජනතාවට කළ විශාල අසාධාරණයක් මෙන් ම ඉතා නරක පුර්වාදර්ශයක් ලෙස ද සැලකිය හැක.
අදාල පුවත පහතින් -
වයඹ පළාත් සභාව සම්බන්ධයෙන් අසත්‍ය තොරතුරු පළ කරන බවට චෝදනා කරමින් පළාත් සභා මාසික සභා රැස්විම වාර්තා කිරිමට පැමිණ සිටි මාධ්‍යවේදීන්ට සභාවෙන් ඉවත්ව යන ලෙස වයඹ පළාත් සභාපති ටිකිරි අධිකාරි මහතා නියෝග කළේය.
වසර 28 කට ආසන්න වයඹ පළාත් සභා ඉතිහාසයේ සභා රැස්වීමෙන් මාධ්‍යවේදින් ඉවත් කිරිම සඳහා සභාපතිවරයකු නියෝගයක් දුන් ප්‍රථම අවස්ථාව මෙය වේ.
සභා රැස්විම ආරම්භයේදීම පෞද්ගලික ප්‍රකාශ යටතේ අදහස් දැක්වු වයඹ පළාත් ප්‍රවාහන හා මහාමාර්ග අමාත්‍ය ගුණදාස දෙහිගම මහතා පැවසුවේ මාධ්‍යයේ අසත්‍ය තොරතුරු පළවන බවට චෝදනා කළේය.
එම ප්‍රකාශයට සහාය දක්වමින් වයඹ ප්‍රධාන අමාත්‍ය ධර්මසිරි දසනායක මහතා ද කියා සිටියේ පසුගිය කාලයේ දී තමන් සම්බන්ධයෙන් ද කිපවරක්ම මාධ්‍ය වල අසත්‍ය තොරතුරු පළවිණි. එය තම කීර්තිනාමයට කැළලක් වු බවත් ඔහු පැවසුවේය.
පසුගිය සතියේ පළවු තවත් ප්‍රවෘතියක් පිළිබඳව අදහස් පළකළ විපක්ෂනායක ප්‍රසන්න ශමල් සෙනරත් මහතා තමන්ගේ කිසිදු සම්බන්ධයක් නොමැති පුවතක් පුවත්පතක පළ වීම සම්බන්ධයෙන් විරෝධය පළ කළේය.
- ලංකාදීප
