( මහින්ද රාජපක්ෂ මහතාගේ ගණන් මිනුම් නිවැරදි නම් ලක්ෂ 15ක් රැකියා අහිමි වූවන් සහ ඔවුන්ගෙන් යැපෙන්නන් ඇතුළුව රටේ සැලකියයුතු පිරිසක් බරපතළ ආර්ථික අපහසුතාවන්ගෙන් පීඩිතව සිටිය යුතු අතර, එවන් තත්වයක් රට තුළ කැරලිකාරී මට්ටමක් දක්වා වර්ධනය විය හැකිව තිබිය යුතුය.
එසේ වී නම් තම රැස්වීම් සඳහා මෙසේ බස් රථ යොදවා සෙනඟ කැඳවා ගැනීමට ඔහුට සිදු නොවනු ඇති අතර අති විශාල ජනකායක් මෙම රජයට එරෙහිව ස්වේච්ඡාවෙන් වීදි බැසිය යුතුය. ප්‍රමාණවත් මුදල් ප්‍රතිපාදන නොමැතිව ආරම්භ කෙරුණු ව්‍යාපෘති යම් ප්‍රමාණයක් නැවතී ඇති බව සැබෑය.
නමුත් ඒ මහින්ද රාජපක්ෂ මහතාට විමල් වීරවංශ හෝ ඒ පන්නයේ ගණිතඥයෙකු විසින් ලියා දුන් ප්‍රමාණයක් නම් නොවන බව පෙනෙන්නේ රටේ එතරම් ම විරැකියාවක් පිළිබඳ සලකුණු නොමැති නිසාය. එමෙන් ම දැනට මුදල් නොමැති ව්‍යාපෘති සඳහා (ඔහුට අනුව 58,000ක්) සතියක් තුළ මුදල් ගෙනෙන්නේ මැදමුලනේ බූදලයෙන්දැයි ඔහු පැහැදිලි කළ යුතුය.
රටට සිදු වූ යම් වරදක් නිවැරදි කිරීමේ අවංක වුවමනාවක් තිබේ නම් මහින්ද රාජපක්ෂ මහතාට කිරීමට ඇති හොඳම දෙය තම පක්ෂයත් ආණ්ඩුවත් දෙකම ඒ ඒ ඒවා කරගෙන යා හැකි උදවියට නිදහසේ කරගෙන යාමට භාරදී මැද මුලනට වී සංචාරය සඳහා එන කෙනෙක් හා සෙල්ෆියක් ගසා ගෙන පාඩුවේ හිඳීමය.)
