ඔවුන් පෙන්වා දෙන්නේ ජාතීන් අතර සංහිඳියාව ඇති කිරීම සඳහා ශ්‍රී ලංකා ආණ්ඩුව පියවර ගත යුතු බවයි.
ජිනීවාහි පැවැත්වෙන එක්සත් ජාතීන්ගේ මානව හිමිකම් කවුන්සිලයේ 29 වන සැසිවාරයේ දී වාර්තාවක් ඉදිරිපත් කරමින් අමෙරිකාව මෙම අදහස් පළ කර තිබේ.
එක්සත් ජාතීන්ගේ මානව හිමිකම් කවුන්සිලයේ 29 සැසිවාරය ඊයේ(15) ආරම්භ වු අතර එය ලබන මස 03 වන දින දක්වා පැවැත්වීමට නියමිතය.
එම සැසිවාරය ආරම්භ කරමින් එක්සත් ජාතීන්ගේ මානව හිමිකම් කවුන්සිලයේ මහකොමසාරිස් සෙයිද් රාද් අල් හුසේන් මහතා ද ශ්‍රී ලංකාව සම්බන්ධයෙන් අදහස් පළකර ඇති බව සඳහන්ය.
ශ්‍රී ලංකාවේ වගවීම සහ ජාතීන් අතර සංහිඳියාව වර්ධනය කිරීම සඳහා විශ්වාසනීය යාන්ත්‍රණයක් අවශ්‍ය බව ඔහු එහිදී පෙන්වා දී තිබේ.
ලබන සැප්තැම්බර් මාසයේ දී ශ්‍රී ලංකාව සම්බන්ධයෙන් ඉදිරිපත් කරන වාර්තාව තුළින් ඒ පිළිබඳ අවධානය යොමුකරන බව මහ කොමසාරිස්වරයා සඳහන් කර ඇත.
ශ්‍රී ලංකාව තුළ ප්‍රජාතන්ත්‍රවාදය සහ නීතියේ ආධිපත්‍යය තහවුරු කිරීම සඳහා නව ආණ්ඩුක්‍රම ව්‍යවස්ථා සංශෝධනයක් ගෙනඒම පිළිබඳව ද සෙයිද් රාද් අල් හුසෙන් සිය සතුට පළ කර තිබේ.
නිරන්තරයෙන් ශ්‍රී ලංකා රජය සමග සහයෝගයෙන් කටයුතු කිරීමට බලාපොරොත්තු වන බව ඔහු එහිදි වැඩිදුරටත් සඳහන් කර ඇත.
අද දෙරණ
