කොළඹ පැවති මාධ්‍ය හමුවක දී එම සංගමයේ නියෝජ්‍ය සභාපති නීතිවේදී සාලිය පිරිස් කියා සිටියේ, 19 වන ආණ්ඩුක්‍රම ව්‍යවස්ථා සංශෝධනය සම්මත කිරීම පිළිබඳව වර්තමානයේ විවිධ අදහස් පළ වෙමින් පවතින බවයි.
විධායක ජනාධිපති ක්‍රමය අහෝසි කිරීම සහ මැතිවරණ ක්‍රමයට සංශෝධන එක් කිරීම වැනි කරුණු ඉටු කිරීම සඳහා කාලයක් ගත විය හැකි බව පවසන නීතිවේදී සාලිය පීරිස් එහෙත් ස්වාධින කොමිෂන් සභා පිළිබද සංශෝධන සම්මත කිරීම පහසුවෙන් ඉටු කළ හැකි බවයි පෙන්වා දෙන්නේ.
‘ප්‍රජාතන්ත්‍රවාදය සහතික කිරීම සඳහා මෙම කොමිෂන් සභා ස්ථාපිත කිරීම බෙහෙවින් වැදගත්. ඒ නිසා ශ්‍රී ලංකා නීතිවේදීන්ගේ සංගමය වශයෙන් අපි සියලු පාර්ලිමේන්තු මන්ත්‍රීවරුන්ගෙන් ඉල්ලා සිටිනවා-පක්ෂ භේදයකින් තොරව ස්වාධීන කොමිෂන් සභා පිහිටුවීම පිළිබඳ යෝජනා සම්මත කිරීමට දායක වන ලෙස’ නීතිවේදී සාලිය පීරිස් කියා සිටියේය.
ශ්‍රීලනිප කොන්දේසි
19 ආණ්ඩුක්‍රම ව්‍යවස්ථා සංශෝධනය සම්මත කිරීමට අවශ්‍ය නම් ඒ සමගම මැතිවරණ ක්‍රමයට අදාළ සංශෝධන ද සිදු කළ යුතු බවට ශ්‍රී ලංකා නිදහස් පක්ෂය මගින් ඉදිරිපත් කර ඇති කොන්දේසිය ගැන විමසීමක් කළ විට ඊට පිළිතුරු දෙමින් නීතිවේදී සාලිය පීරිස් ප්‍රකාශ කළේ, දේශපාලන පක්ෂයක් දරන අදහසක් පිළිබඳව සංගමයක් වශයෙන් තමන්ට කිසිවක් ප්‍රකාශ කල නොහැකි බවයි.
උපරිමාධිකරණ ආයතනවලට විනිසුරුවරුන් පත් කිරීමේදී ශ්‍රී ලංකා නීතිවේදීන්ගේ සංගමයේ අදහස් විමසිය යුතු බවට 19 වන ආණ්ඩුක්‍රම ව්‍යවස්ථා සංශෝධන කෙටුම්පතින් දක්වා ඇති ප්‍රතිපාදනය නිසා අධිකරණයේ ස්වාධීනත්වයට බාධා එල්ල වන බවට හිටපු ජනාධිපති මහින්ද රාජපක්ෂ කරන ප්‍රකාශ ගැන අවධානය යොමු කළ නීතිවේදී සාලිය පීරිස් කියා සිටියේ, අදාළ ක්‍රියාදාමය සඳහා නීතිවේදීන්ගේ සංගමයේ අදහස් විමසීම නිසා ආණ්ඩුක්‍රම ව්‍යවස්ථාව උල්ලංඝනය නොවන බව ශ්‍රේෂ්ඨාධිකරණය විසින් තීන්දු කරනු ලැබ ඇති බවයි.
අවසන් අවස්ථාව
‘එවිට සිදු වන්නේ අදහස් විමසීමක් පමණයි. අදහස විමසීමක් තුලින් ව්‍යවස්ථාව කඩ නොවන බව ශ්‍රේෂ්ඨාධිකරණය තීරණය කර තිබෙනවා’ නීතිවේදී සාලිය පීරිස් අවධාරණය කළේය.
මෙහි දී ශ්‍රී ලංකා නීතිවේදීන්ගේ සංගමයේ නියෝජ්‍ය සභාපති නීතිවේදී සාලිය පීරිස් පාර්ලිමේන්තුව නියෝජනය කරන සියලු මන්ත්‍රීවරුන්ගෙන් ඉල්ලා සිටියේ,ස්වාධීන කොමිෂන් සභා ස්ථාපිත කිරීමට තිබෙන අවසන් අවස්ථාව මෙය බැවින් එය පැහැර හැරීමට කටයුතු නොකරන ලෙසයි.
bbc
