නීති විරෝධීව හා අයථා අන්දමින් ඉපැයූ මුදල්, වාහන එකොළහක් යොදාගෙන ප්‍රවාහනය කළේද යන්න පිළිබඳ පරීක්ෂණ පැවැත්වෙන බව කරුණු වාර්තා කර ඇත. සෙනරත් මහතාගේ බැංකු ගිණුම් තොරතුරු අනාවරණය කර ගැනීමටද පරීක්ෂණ ආරම්භ කරන බවත් ඒ මහතාගේ සමාගම් දෙකක් පිළිබඳ හා නිවාඩු නිකේතනයක් ඇතුළු නිවාස නවයක් (9) පිළිබඳ පැමිණිලි ලැබී ඇති බවත් රහස් පොලිසිය කරුණු ඉදිරිපත් කර ඇත.

අපරාධ පරීක්ෂණ දෙපාර්තමේන්තුවේ මහජන පැමිණිලි අංශයට ලැබුණු පැමිණිල්ලක් මත 2006 අංක 05 දරන මුදල් විසුද්ධිකරණ වැළැක්වීමේ පනත යටතේ මෙම පරීක්ෂණ ආරම්භ කර ඇත.

ගාමිණී සෙනරත් මහතා නීති විරෝධී හා අයථා අන්දමින් මුදල් හා දේපළ රැස්කර ඇති බවට ජාතික හෙළ උරුමයේ ජාතික සංවිධායක සහ දූෂණ විරෝධී පෙරමුණේ කැඳවුම්කාර මණ්ඩල සභාපති නිශාන්ත ශ්‍රී වර්ණසිංහ මහතා රහස් පොලිසියට පසුගිය 26 දින ඉදිරිපත් කළ පැමිණිල්ලක් අනුව පරීක්ෂණ ආරම්භ කිරීමට යන බව කරුණු දක්වා ඇත.

2013 සැප්තැම්බර් 25 දින හා 2013 දෙසැම්බර් 19 යන කාලය අතරතුරදී මේ අයථා මුදල් ඉපැයීම කර ඇති බව නිශාන්ත ශ්‍රී වර්ණසිංහ මහතා පැමිණිලිකර ඇති අතර මුදල් ප්‍රවාහනය කළ වාහන අංක එකො‍ළහක් ද ඉදිරිපත් කර ඇත.

- dinamina