බැසිල් රාජපක්ෂ මහතා ශ්‍රී ලංකාවට ඇතුළු වූ විගස අත්අඩංගුවට ගන්නා ලෙස අධිකරණය කරන ලද නියෝගය බල රහිත කර සිය නීතිඥයින් මගින් මූල්‍ය අපරාධ විමර්ශන කොට්ඨාසයට බැසිල් රාජපක්ෂ මහතා ඉදිරිපත් වීම සඳහා වූ නියෝගයක් ලබාදෙන ලෙස ඉල්ලා බැසිල් රාජපක්ෂ මහතාගේ ජ්‍යෙෂ්ඨ නීතිඥ යූ. ආර්. ද සිල්වා මහතා මෝසමක් මඟින් ඉල්ලා සිටිය ද මහේස්ත්‍රාත්වරයා ඔහුගේ ඉල්ලිම ප්‍රතික්ෂේප කළේය.
එම ඉල්ලීම ප්‍රතික්ෂේප කළ මහේස්ත්‍රාත්වරයා පෙර දිනක දී අධිකරණය මඟින් නිකුත් කළ නියෝගයට අනුව කටයුතු කරමින් සැකකරු අත්අඩංගුවට ගෙන මහේස්ත්‍රාත් හමුවට ඉදිරිපත් කළ යුතු බව ද දැනුම් දුන්නේ ය.
කෙසේ නමුත් අසනීප තත්ත්වයෙන් පසුවන නිසා තවත් දින කිහිපයක් ප්‍රමාද වී මූල්‍ය අපරාධ විමර්ශන ඒකකයට පැමිණෙන බව හිටපු අමාත්‍ය බැසිල් රාජපක්ෂ මහතා මූල්‍ය අපරාධ විමර්ශන අංශයට දැනුම් දී තිබේ.
පොලිස් මූල්‍ය වංචා විමර්ශන කොට්ඨාසය නොමැතිව මෙම මූල්‍ය වංචා පැමිණිල්ල විභාගයට ගැනුණු අතර ආර්ථික සංවර්ධන අමාත්‍යාංශය යටතේ වූ දිවි නැඟුම දෙපාර්තමේන්තුවේ පාරිතෝෂික මුදල් අක්‍රමිකතා, පසුගිය ජනාධිපතිවරණය වෙනුවෙන් දිවි නැඟුම දෙපාර්තමේන්තුව සතු මුදල් වැය කිරීම, රුපියල් මිලියන හැත්තෑවක් සමුළුවක් සඳහා වැය කිරීම, 2006 වසරේ ශ්‍රී ලංකාව මිලදී ගත් මිග් ගුවන්යානා හතරක් අලුත්වැඩියා කිරීම සඳහා රුපියල් මිලියන දහහතර හමාරක් වැය කිරීම, ඇතුළු මූල්‍ය අක්‍රමිකතා ගණනාවක් මුල් කරගෙන මූල්‍ය අපරාධ කොට්ඨාසය විසින් මෙම පැමිණිල්ල ගොනු කර තිබේ.
බැසිල් රාජපක්ෂ මහතා වෙනුවෙන් පෙනී සිටි ජ්‍යෙෂ්ඨ නීතිඥ යූ.ආර්. ද සිල්වා මහතා සමඟ තවත් නීතිඥයින් විසිදෙනෙක් ඉදිරිපත් වූහ.
