අද පෙරවරුවේ සිව්දින නිල සංචාරයක් සඳහා ඔහු දිවයිනෙන් පිටත්ව යන බව ජනාධිපති මාධ්‍ය අංශය පැවසුවේය.
අදාළ සංචාරය තුළ දී ජනාධිපති මෛත්‍රීපාල සිරිසේන මහතා බ්‍රිතාන්‍යයේ පැවැත්වෙන පොදුරාජ්‍ය මණ්ඩලයීය දින සැමරුම් උළෙලට ද සහභාගී වීමට ද නියමිතය. ජනාධිපතිවරයා පොදුරාජ්‍ය මණ්ඩලයේ සභාපතිවරයා ලෙස එම උළෙලට එක්වේ. ජනාධිපතිවරයාගේ බි‍්‍රතාන්‍ය සංචාරයේ දී එරට අග්රාමාත්ය ඬේවිඞ් කැමරන් මහතා සමග සාකච්ඡා පැවැත්වීමට ද නියමිතයි. සර්ව පාක්‍ෂික පාර්ලිමේන්තු කණ්ඩායම් සමග ද ජනාධිපතිවරයා සාකච්ඡා කරන බව ජනාධිපති මාධ්‍ය ඒකකය නිවේදනය කළේය.
ඊට අමතරව පොදුරාජ්‍ය මණ්ඩලයීය සැමරුම් උළෙලට සහභාගී වන රාජ්‍ය නායකයින් සඳහා බකින්හැම් මාලිගාවේ දී මහරැජිණ විසින් පිරිනැමෙන රාත්‍රී භෝජන සංග්‍රහයකට ද මෛත්‍රීපාල සිරිසේන ජනාධිපතිවරයා සහභාගී වනු ඇත.
මේ අතර ඊයේ පැවති මාධ්‍ය හමුවේදී අදහස් දැක් වූ විදේශ කටයුතු නියෝජ්‍ය අමාත්‍ය අජිත් පී. පෙරේරා මහතා සඳහන් කළේ ජනාධිපතිවරයාගේ මෙම බි‍්‍රතාන්‍ය සංචාරයට 11 දෙනෙකුගෙන් යුත් දූත පිරිසක් පමණක් සහභාගි වන බවයි.
