ඒ සම්බන්ධයෙන් හෙට දිනයේ විවාදයක් පැවැත්වීමට නියමිත බව ආණ්ඩු පක්ෂයේ ප්‍රධාන සංවිධායක අමාත්‍ය ගයන්ත කරුණාතිලක මහතා සඳහන් කළේය.
එම විවාදය හෙට පෙරවරු 9.30 සිට පස්වරු 6.30 දක්වා පැවැත්වීමට නියමිත අතර අනතුරුව එය පාර්ලිමේන්තුවේ දී සම්මත කරගැනීමට සැලසුම් කර ඇත.
පසුගිය වසර කිහිපය තුළ අවස්ථා ගණනාවකදීම ජාතික ඖෂධ පනත පාර්ලිමේන්තුවට ඉදිරිපත් කිරීමට උත්සාහ කළ ද එය මගහැරී ගිය අතර මෛත්‍රීපාල සිරිසේන මහතාගේ මැතිවරණ ප්‍රකාශනයේ ද එයට ප්‍රධාන ස්ථානයක් හිමිවූයේය.
මේ අතර ජාතික ඖෂධ ප්‍රතිපත්තිය හදිසියේ පාර්ලිමේන්තුවට ඉදිරිපත් කර සම්මත කිරීමේ සූදානම සැක සහිත බව පෙරටුගාමී සමාජවාදී පක්ෂය මාධ්‍ය හමුවක් කැදවමින් ඊයේ ප්‍රකාශ කළේය.
අන්තර් විශ්වවිද්‍යාලීය ශිෂ්‍ය බල මණ්ඩලය සෞඛ්‍ය අමාත්‍ය රාජිත සේනාරත්න මහතා වෙත ලිපියක් යොමු කරමින් පවසා ඇත්තේ ජාතික ඖෂධ පනත හදිසියේ සම්මත කිරිම වහාම නවත්වන ලෙසයි. එය සම්මත කර ගැනීම පෙර සෞඛ්‍ය ක්ෂේත්‍රයේ වෘත්තිය සමිති, විද්වතුන් හා විෂය ප්‍රවීනයන්ගේ පුළුල් සංවාදයට ලක් කිරීමට ඉඩ සකස් කළ යුතු බව ඔවුන් අවධාරණය කරයි.
