කොළඹ නගරයේ හා අවට මැයි දින රැලි හා පෙළපාලි පැවැත්වෙන ස්‌ථාන ඒ ඒ දේශපාලන පක්‍ෂ වලට හා වෘත්තීය සමිතිවලට වෙන්කර දීම සඳහා පසුගිය බ්‍රහස්‌පතින්දා නියෝජ්‍ය පොලිස්‌පති ගාමිණී මතුරට මහතාගේ ප්‍රධානත්වයෙන් පැවැති
රැස්‌වීමේදී ශ්‍රීලනිපයට හැර අනිකුත් පක්‍ෂවලට ස්‌ථාන වෙන් කොට දී තිබේ.
පසුගිය වසරේ ශ්‍රීලනිප ප්‍රමුඛ එක්‌සත් ජනතා නිදහස්‌ සන්ධානයේ මැයි රැලිය බොරැල්ල කැම්බල් පිටියේ පවත්වනු ලැබූ නමුත් මෙවර එය එක්‌සත් ජාතික පක්‍ෂයේ මැයි රැලිය සඳහා ලබා දී ඇත.
ඒ අනුව එජාප මැයි පෙළපාලිය කොළඹ සුගතදාස ක්‍රීඩාංගණය අසලින් ආරම්භ වන අතර රැලිය කැම්බල් පිටියේ පැවැත්වෙනු ඇත.
ශ්‍රීලනිප මැයි රැලිය හා පෙළපාලිය සඳහා ස්‌ථාන ලබා ගැනීම පිළිබඳව පක්‍ෂයේ සභාපති වන ජනාධිපති මෛත්‍රීපාල සිරිසේන මහතා දැනුවත් කිරීමට බලාපොරොත්තු වන බව ද ආරියසේන මහතා කීය.
මේ අතර නියෝජ්‍ය පොලිස්‌පති ගාමිණී මතුරට මහතාගේ ප්‍රධානත්වයෙන් ඉකුත් 26 දා පැවැති
රැස්‌වීමේදී ඒ ඒ පක්‍ෂවලට මැයි රැලි හා පෙළපාලි සඳහා වෙන් කොට දී ඇති ස්‌ථාන මෙසේය.
සමසමාජ හා කොමියුනිස්‌ට්‌ පක්‍ෂ, ප්‍රජාතන්ත්‍රවාදී වාමාංශික පෙරමුණේ, ශ්‍රී ලංකා මහජන පක්‍ෂය සහ දේශ විමුක්ති ජනතා පක්‍ෂය විසින් පිහිටුවා ගෙන ඇති සමාජවාදී ජනතා පෙරමුණේ පෙළපාලිය නාරාහේන්පිට ශාලිකා ශාලාව අසලින් ආරම්භ වන අතර රැලිය නුගේගොඩ ආනන්ද සමරකෝන් පිටියේදී පැවැත්වේ.
ජනතා විමුක්ති පෙරමුණේ මැයි පෙළපාලිය දෙහිවල සතුන් වත්ත අසල පිටියකින් ආරම්භ වී කළුබෝවිල සරණංකර මාවත ඔස්‌සේ පාමංකඩට පැමිණීමෙන් පසු රැලිය බී. ආර්.සී. පිටියේදී පැවැත්වේ.
ජෙනරාල් සරත් ෆොන්සේකා මහතාගේ නායකත්වයෙන් යුත් ප්‍රජාතන්ත්‍රවාදී පක්‍ෂයේ මැයි පෙළපාලිය බොරැල්ල හන්දිය අසලින් ඇරැඹෙන අතර, රැලිය නාරාහේන්පිට ශාලිකා පිටියේදී පැවැත්වේ.
විමල් වීරවංශ මහතාගේ නායකත්වයෙන් යුත් ජාතික නිදහස්‌ පෙරමුණේ හා ජාතික හෙළ උරුමය මෙවර මැයි රැලි සඳහා අවසර ඉල්ලා නොමැති බව ද දැන ගන්නට ඇත.
තවත් වෘත්තීය සමිති ගණනාවකට ද මෙහිදී මැයි රැලි හා පෙළපාලි සඳහා ස්‌ථාන වෙන් කර දී තිබේ.
- දිවයින ඉරිදා සංග්‍රහය
