චීනයේ නිල සංචාරයක නිරත විදේශ කටයුතු ඇමැතිවරයා මේ බව සඳහන් කළේ බීජිං නුවර දී විදේශ මාධ්‍ය අමතමින් බව විදේශ කටයුතු අමාත්‍යාංශය සඳහන් කරයි. චීන රජයේ ආධාර මත ක්‍රියාත්මක වරාය නගර ව්‍යාපෘතිය පමණක් නොව අනෙකුත් ව්‍යාපෘති සම්බන්ධයෙන් ද සොයා බලන බව ප්‍රකාශකර තිබෙන ඒ මහතා ඉදිරියේ දී රටට පැමිණෙන ආයෝජන පිළිබඳව තීරණයක් ගනු ලබන්නේ ඵලදායිතාවය සහ අදාළ සුදුසුකම් අනුව බවද හෙතෙම පෙන්වා දෙයි.
මේ අතර නිල සංචාරයක් සඳහා චීනය බලා පිටත්ව ගිය විදේශ කටයුතු ඇමැති මංගල සමරවීර මහතා අද (28) එරට රජයේ ඉහළ පෙළේ නියෝජිතයන් සමඟ ද්වීපාර්ශවික සාකච්ඡා පැවැත්වීමට නියමිත අතර ඒ අනුව චීන කොමියුනිස්ට් පක්ෂයේ වැන්ග් ෂියා සහ එරට වාණිජ කටයුතු ඇමැති ගාඕ වියුචේන් (Gao Hucheng) මහත්වරු හමුවී සාකච්ඡා කරන බව විදේශ කටයුතු අමාත්‍යාංශය පවසයි.
චීන විදේශ කටයුතු ඇමැති වැන්ග් ඊ (Wang Yi) මහතාගේ ආරාධනයකට අනුව විදේශ කටයුතු ඇමැතිවරයා චීනය බලා පිටත්ව ගිය අතර එම සංචාරය දෙරටටම වැදගත් වනු ඇතැයි ද එම අමාත්‍යාංශය කියයි. එම සංචාරයේ දී ශ්‍රී ලංකාව සහ චීනය අතර තිබෙන ද්වීපාර්ශවික සබඳතා තවදුරටත් ශක්තිමත් කර ගැනීමට නියමිත අතර මංගල සමරවීර මහතා සිය සංචාරය අතරතුර චීන විදේශ කටයුතු ඇමැති වැන්ග් ඊ මහතා ඇතුළු රජයේ ඉහළ පෙළේ නියෝජිතයන් හමුවී සාකච්ඡා කිරීමට ද නියමිතව තිබේ.
ශ්‍රී ලංකාවේ නව රජය බලයට පත් වීමෙන් පසු චීනයේ නිල සංචාරයක යෙදෙන පළමු ඇමැතිවරයා මංගල සමරවීර මහතා වන අතර එම සංචාරය තුළදී විදේශ ඇමැතිවරයා දෙරටට වැදගත් වන කරුණු රැසක් සම්බන්ධයෙන් සාකච්ඡා කිරීමට නියමිත බවද විදේශ කටයුතු අමාත්‍යාංශය සඳහන් කරයි. අසල්වැසි මිත්‍ර රටක් ලෙස ශ්‍රී ලංකාව සමඟ සබඳතාවලට චීනය වැඩි අවධානයක් යොමු කර තිබෙන අතර චීනයේ සහකාර විදේශ ඇමැති Liu Jianchao මහතා එරට ජනාධිපතිවරයාගේ විශේෂ නියෝජිතයෙකු ලෙස පසුගිය දා ශ්‍රී ලංකාවේ සංචාරය කළේය.
ශ්‍රී ලංකා ජනාධිපති මෛත්‍රීපාල සිරිසේන මහතා ලබන මාර්තු මාසයේ චීනයේ නිල සංචාරයක නිරත වීමට නියමිතව තිබේ.
