මේවන විට ජාතික හෙළ උරුමය, ජාතික නිදහස් පෙරමුණ, මහජන එක්සත් පෙරමුණ, නව වමාංශික පෙරමුණ, සමසමාජ පක්ෂය, කොමියුනිස්ට් පක්ෂය මේ වන විට සන්ධානයෙන් බැහැරව කටයුතු කරමින් සිටින අතර අනෙකුත් පක්ෂ ගණනාවක්ම අක්‍රීයව සිටී.
මේ සම්බන්ධයෙන්, එක්සත් ජනතා නිදහස් සන්ධානය යටතේ පක්ෂ 14 ක් තරග කළ අතර එහි බහුතර බලය ශ්‍රී ලංකා නිදහස් පක්ෂය සතුව තිබෙන බවත්, එක්සත් ජනතා නිදහස් සන්ධානය යටතේ මෙතෙක් කටයුතු කළ කිසිදු පක්ෂයක් ඉවත් වී කටයුතු කරන බවට මෙතෙක් නිල වශයෙන් ප්‍රකාශ කර නොමැති බවද ශ්‍රී ලනීප ජාතික සංවිධායක හා සන්ධානයේ ලේකම් පාර්ලිමේන්තු මන්ත්‍රී සුසිල් ප්‍රේමජයන්ත මහතා සඳහන් කළේය.
එක්සත් ජනතා නිදහස් සන්ධානය යටතේ තරග කළ පක්ෂවලට තනි තනිවම හෝ පක්ෂ කිහිපයක් එකතුව තමන් දරන දේශපාලන මතය ප්‍රකාශ කිරීමට හැකියාව තිබුණත්, එක්සත් ජනතා නිදහස් සන්ධානයේ නම හෝ බුලත් කොළය ලකුණ යටතේ එම කණ්ඩායම්වලට වෙනම ශ්‍රී ලනීපය නොමැතිව මැතිවරණවලට ඉදිරිපත් විය නොහැකි බවද ඔහු පවසා සිටියේය.
මෙම මස 18 වැනිදා නුගේගොඩදී පක්ෂ කිහිපයක් එක්ව සිදුකරන රැලියට ශ්‍රී ලංකා නිදහස් පක්ෂයට මෙතෙක් ආරාධනා ලැබී නොමැති බවත්, එවන් තත්ත්වයක් තුළ ශ්‍රී ලංකා නිදහස් පක්ෂය නියෝජනය කරන පිරිස් එම ස්ථානයට ගියා කියා සන්ධානයට කිසිදු ප්‍රශ්නයක් නොමැති බවද ඔහු පවසයි.
