කුමාර් ගුණරත්නම් ඕස්‌ට්‍රේලියාවේ සිට ශ්‍රී ලංකාවට පැමිණ ඇත්තේ සංචාරක වීසා බලපත්‍රයකිනි. එම බලපත්‍රය වලංගු කාලසීමාව ඉකුත් ජනවාරි 31 දා අවසන් විය. ඒ නිසා ඔහු රටින් පිට විය යුතුය. නැත්නම් අත්අඩංගුවට ගෙන පිටුවහල් කළ යුතු යෑයිද නියෝජ්‍ය සොලිස්‌ටර් ජනරාල්වරයා කීය.
නියෝජ්‍ය සොලිස්‌ටර් ජනරාල්වරයා එසේ පැවසුවේ කුමාර් ගුණරත්නම් අත්අඩංගුවට ගෙන රටින් පිටුවහල් කිරීමට ආගමන හා විගමන පාලකවරයා ඇතුළු රජයේ බලධාරීන් ගෙන ඇති තීරණය අවලංගු කරන්නැයි ඉල්ලා ගුණරත්නම් මහතා ශ්‍රේෂ්ඨාධිකරණයට ගොනු කර ඇති පෙත්සමට රජයේ නීතිපතිවරයා දක්‌වන ප්‍රතිචාරය පැහැදිලි කරමිනි.
මෙම පෙත්සම ඊයේ (13 දා) ශේ්‍රෂ්ඨාධිකරණය හමුවේ සලකා බැලීමට නියමිතව තිබූ නමුත් පෙත්සම්කරු වෙනුවෙන් පෙනී සිටින ජනාධිපති නීතිඥ රොමේෂ් ද සිල්වා මහතා උසාවියට පැමිණ සිටියේ නැත. ඒ නිසා පෙත්සම සලකා බැලීම ලබන 28 වැනිදා තෙක්‌ කල් දමන ලදී. කුමාර් ගුණරත්නම් රටින් පිටුවහල් කිරීම අත්හිටුවමින් ශ්‍රේෂ්ඨාධිකරණය පනවා තිබූ නියෝගය ක්‍රියාත්මක වීම ලබන 29 දා තෙක්‌ දීර්ඝ කෙරිණි.
ඊවා වනසුන්දර සහ සිසිර ද ආබෲ යන ශ්‍රේෂ්ඨාධිකරණ විනිසුරු මඩුල්ල හමුවේ ඊයේ මෙම පෙත්සම කැඳවිණි.
කුමාර් ගුණරත්නම් යන අයගේ නීතිඥවරයා වන නුවන් බෝපගේ මහතා මගින් ගොනු කර ඇති පෙත්සමෙන් කියා සිටින්නේ ඔහු ශ්‍රී ලංකාවේ ඉපදී සෑහෙන කලක්‌ දෙමාපියන් සෙවනේ හැදී වැඩී පාසල් අධ්‍යාපන ලැබූ අයකු බවයි. ජනතා විමුක්ති පෙරමුණේ ඇතිවූ අභ්‍යන්තර අර්බුද නිසා සහ තවත් හේතූන් උඩ තම ජීවිතයට හානියක්‌ වේයෑයි බියෙන් ඕස්‌ටේ්‍රලියාවට ගිය බවත් එහිදී නොයෙල් මුදලිගේ යන නමින් පුරවැසිභාවය ලබාගත් බවත් තමා එසේ කළේ ඕස්‌ට්‍රේලියාවේ පුරවැසිභාවය ලැබූ වහාම ශ්‍රී ලංකාවේ පුරවැසිකම තමන්ට ඉබේම අහිමි වන බව නොදැන බවත් කෙසේ වුවද ඕස්‌ටේ්‍රලියාවේ පුරවැසිකම අත්හැර ශ්‍රී ලංකාවේ පුරවැසි භාවය ලබාගෙන දිගටම මෙහි පදිංචිව සිටීම තමාගේ අපේක්‍ෂාව බවත් එතෙක්‌ තමා රටින් පිටුවහල් කිරීම වළක්‌වන ලෙස තමා ශ්‍රේෂ්ඨාධිකරණයෙන් ඉල්ලීමක්‌ කරන බවත් පෙත්සමේ සඳහන් කර ඇත.
තමා ශ්‍රී ලංකාවේ උප්පත්තිය ලැබූ අයෙකු නිසා කවර හේතුවක්‌ උඩ හෝ තම මව්බිමට තමාට ඇති අයිතිය කිසිවකු ට අහිමි කළ නොහැකි බවත් එසේ කිරීම නීතියට සහ සාධාරණ යුක්‌තියේ මූලධර්මවලට පටහැනි බවත් පෙත්සම්කරු කියා සිටී.
