මෙම විවාදය සඳහා පාර්ලිමේන්තුව අද විශේෂයෙන් රැස්‌වේ. මොහාන් පීරිස් මහතා අගවිනිසුරු ධුරයෙන් ඉවත් කිරීමේ ක්‍රමවේදය ව්‍යවස්‌ථානුකූල නොවන බවට පසුගිය 29 දා විපක්‍ෂ නායක නිමල් සිරිපාල ද සිල්වා මහතාද, දිනේෂ් ගුණවර්ධන මහතා ද පාර්ලිමේන්තුවේදී විශේෂ ප්‍රකාශ දෙකක්‌ කළහ. ඊට පසුදා (30 දා) එම ප්‍රකාශ දෙක වෙනුවෙන් අගමැති රනිල් වික්‍රමසිංහ මහතා පිළිතුරු කතාව ඉදිරිපත් කළේය.
ඉන්පසු ඒ සම්බන්ධව එදිනම විවාදයක්‌ ඉල්ලා විපක්‍ෂය මැතිසබය තුළ ඝෝෂා කළ අතර මෙම 05 වැනිදා සවස්‌ වරුවේ විවාදයක්‌ ලබාදිය හැකි බව අගමැතිවරයා කීවේය.
එහෙත් විපක්‍ෂය එදිනම හෝ 02 වැනිදා (අද) විවාදයක්‌ ලබාදිය යුතු බවට දිගින් දිගටම ඝෝෂා කිරීම නිසා දෙවරක්‌ සභාව අත්හිටවූ කථානායක චමල් රාජපක්‍ෂ මහතා පසුව පාර්ලිමේන්තුව කල් තැබුවේය.
ඉන්පසුව පක්‍ෂ නායකයන් රැස්‌ වී අද දින මෙම විවාදය පැවැත්වීමට එකඟ වී තිබේ. ඒ අනුව අද සවස 1.00 ට පාර්ලිමේන්තුව රැස්‌වේ. සඳුදා දින සාමාන්‍යයෙන් පාර්ලිමේන්තු පැවැත්වෙන දිනයක් නොවේ. කෙසේ නමුත් මෙම විවාදය මඟින් මොහාන් පීරිස් මහතාගේ ඉවත් කිරීම සම්බන්ධයෙන් ව්‍යවස්ථාදායකයේ අනුමැතියද සහතික වනු ඇත.
