2014 ජූනි 30 වන දින දරණ CSA/7/4/1 අංකය සහිත ලිපියෙන් ජනාධිපති මහින්ද රාජපක්ෂ මහතා විසින් වහාම ක්‍රියාත්මක වන පරිදි තමා විශ්ව විද්‍යාල ප්‍රතිපාදන කොමිෂන් සභාවේ සාමාජිකයෙකු ලෙස ලබා දුන් පත්වීම තමා ඉතා ගෞරවයෙන් යුතුව බාරගත් බවත්, මාස 6ක පමණ කාලයක් පුරා තමාගේ හැකියාවන් යොදා ගනිමින් නිදහස් අධ්‍යාපනය රැකගැනීමට , දියුණු කිරීමට හා දේශීය දැනුමට නිසි තැන ලබාදීමට කටයුතු කළ බව නලින්ද සිල්වා මහතා තම ඉල්ලා අස්වීමේ ලිපියේ සඳහන් කර තිබේ.
එහෙත් මෛත්‍රීපාල සිරිසේන මහතා ජනාධිපතිවරයා ලෙස 2015 ජනවාරි මස 09 වන දින දිවුරුම් දුන් අවස්ථාවේදී තත්ත්වයෙහි වෙනසක් සිදුවූ බැවින් තමාගේ ගෞරවය රැකගනිමින් විශ්ව විද්‍යාල ප්‍රතිපාදන කොමිෂන් සභා සාමාජිකත්වයක් දැරීමට නොහැකි තත්ත්වයක් උදාවී ඇති බවත්,එබැවින් තමන් සාමාජිකත්වයෙන් ඉල්ලා අස්වන බවත්, ඒ හේතුවෙන් යම් අපහසුවක් වීනම් ඒ පිළිබඳ තමන් කනගාටුවන බවත් නලින්ද සිල්වා මහතා ස්වකීය ලිපියෙන් අවධාරණය කරයි.
ඔහුගේ ඉල්ලා අස්වීමේ ලිපිය මේවන විට ජනාධිපති ලේකම්වරයාට යොමුකර තිබේ.
එම ලිපියේ පිටපත් උසස් අධ්‍යාපන අමාත්‍යංශ ලේකම්වරයාටත්, විශ්ව විද්‍යාල ප්‍රතිපාදන කොමිෂන් සභාවේ සභාපතිනියටත් යොමු කර තිබේ.
