ඉන්දීය රජයෙන් ලැබුණු නිළ ආරාධනයකට අනුව විදේශ අමාත්‍ය මංගල සමරවීර මෙම සංචාරය සිදුකරන බව විදේශ අමාත්‍යාංශය ප‍්‍රකාශ කළේය. කෙසේ නමුත් මෙහිදී ජනපති මෛත්‍රීපාල සිරිසේන මහතාගේ විශේෂ පණිවිඩයක් විදේශ ඇමැතිවරයා විසින් රැගෙන ගිය බවත් වාර්තාවේ.
ඉන්දීය මාධ්‍ය වාර්තා කළේ ලබන සඳුදා විදේශ අමාත්‍ය මංගල සමරවීර ඉන්දීය අග‍්‍රාමාත්‍ය නරේන්ද්‍ර මෝදි හමුවනු ඇති බවය. මීට අමතරව ඉන්දීය විදේශ ඇමතිනී සුෂ්මා ස්වරාජ් ඇතුළු ඉන්දීය රජයේ ඉහළ පෙළේ රාජ්‍ය තාන්ත‍්‍රිකයින් කිහිප දෙනෙකු සමඟ ද ද්වි පාර්ශවීය සාකච්ඡා පැවැත්වීමට නියමිතය. මෙම සාකච්ඡා හෙට දිනයේ ආරම්භවීමට නියමිත බව විදේශ කටයුතු නියෝජ්‍ය අමාත්‍ය අජිත් පී. පෙරේරා සදහන් කළේය.
පසුගිය රාජපක්ෂ පාලන සමයේදී ඉන්දියාව සමඟ වන රාජ්‍ය තාන්ත්‍රික සබඳතා දුර්වලව පැවැති අතර මෙම සංචාරයේ අරමුණ ඒ නැවත ශක්තිමත් කර ගැනීම බවද විදේශ අමාත්‍යාංශ අරංචි මාර්ග පවසයි. මේ අතර, විදේශ අමාත්‍යවරයාගේ ඉන්දීය සංචාරයත් සමඟ මෙරට අත්අඩංගුවේ පසුවන ඉන්දීය ධීවරයන් 15 දෙනෙකු නිදහස් කිරීමට තීරණය කර තිබේ.
