එමෙන්ම 2010 ජනාධිපතිවරණයට සාපේක්ෂව රාජ්‍ය දේපළ අවභාවිතයේ කැපී පෙනෙන වර්ධනයක් පෙන්නුම් කරන බවද එම සංවිධානය සදහන් කරයි. පසුගිය ජනාධිපතිවරණයේදී රාජ්‍ය දේපොළ අවභාවිතය සම්බන්ධයෙන් වාර්තා වූ සිද්ධීන් පනස් තුනට සාපේක්ෂව මෙවර රාජ්‍ය දේපොළ අවභාවිතය සම්බන්ධයෙන් සිද්ධීන් එකසිය හතළිස් හතක් මේ වන විට වාර්තා වී ඇති බව පැෆ්රල් සංවිධානය ජනාධිපතිවරණයට අදාළව නිකුත් කළ අතුරු වාර්තාවක දැක්වේ.
පසුගිය ජනාධිපතිවරණයේදී වාර්තා වූ නීති උල්ලංගණය කිරීමේ සිද්ධීන් පන්සිය හැත්තෑ දෙකට සාපේක්ෂව වත්මන් මැතිවරණයේදී මේ වන විට සිද්ධීන් පන්සිය පනහ ඉක්මවා වාර්තා වී ඇතැයිද එම වාර්තාවේ දැක්වේ.
මෙවර වාර්තා වී ඇති ප‍්‍රචණ්ඩකි‍්‍රයා සංඛ්‍යාව එකසිය හැට දෙකකි. මහනුවර දිස්ති‍්‍රක්කයෙන් ප‍්‍රචණ්ඩ කි‍්‍රයා විසි දෙකක් සහ කුරුණෑගල දිස්ති‍්‍රක්කයෙන් විස්සක් වාර්තා වී ඇතැයිද පැෆරල් සංවිධානය නිකුත් කළ වාර්තාවේ සඳහන්ය.
