ජූලි 07 දා දාතමින් ගෝඨාභය රාජපක්ෂ යටතේ ඇති ආරක්ෂක අමාත්‍යාංශය අරුම පුදුම නීතියක් පනවා තිබේ. මේ නීතියෙන් කියැවෙන්නේ රාජ්‍ය නොවන සංවිධානවලට පුවත් පත් සාකච්ජා පැවැත්වීම, පුවත් පත් නිවේදන නිකුත් කිරීම සහ වැඩමුළු පැවැත්වීම තහනම් කැරෙන බවය.
චක්‍ර ලේඛනයක් ලෙස නිකුත් කර ඇතත් එය නීතියක් මෙන් තහනම් නියෝග පනවා තිබේ. මෙම තහනම් නියෝග මගින් තහංචි පණවා ඇත්තේ මූලික මානව හිමිකම් ලෙස අර්ථ දැක්වෙන ප්‍රකාශනයේ නිදහසට සහ සමාගමයේ නිදහසට ය.
නීතියක මුලික අංගයක් වන අර්ථ දැක්වීම් කිසිවක් මෙම වක්‍ර ලේඛනයේ නැත. තහනම් කැරෙන ක්‍රියා සම්බන්ධයෙන් පමණක් නොව රාජ්‍ය නොවන සංවිධාන යනු මොනවාදැයි ඉන් අර්ථ දැක්වෙන්නේ නැත. මේ අනුව ආගමික සැදැහැවතුන්ගේ එකතුවක්, ගමක මරණාධාර සමිතියක්, විද්වතුන්ගේ සංගමයක් මෙන්ම ජනමාධ්‍ය වේදීන්ගේ සංගමයක් යනාදී ඕනෑම සංවිධානයක කට බැදීමට රාජපක්ෂවරුන්ට හැකි ය.
කෙසේ නමුත්, රාජ්‍ය ආරක්ෂක හා නාගරික සංවර්ධන අමාත්‍යාංශයේ මාධ්‍ය කේන්ද්‍රයේ අධ්‍යක්ෂ බි‍්‍රගේඩියර් රුවන් වනිගසූරිය ප‍්‍රකාශ කළේ එවැනි පියවරක් පිළිබඳ තමන්ට මෙතෙක් දැන ගන්නට ලැබී නොමැති බවයි.
