ජනාධිපතිවරයා එම ප්‍රකාශය කිරීමෙන් අනතුරුව ජනාධිපතිවරණය පැවැත්වීම සඳහා නාමයෝජනා කැඳවීමේ ගැසට්‌ නිවේදනය මැතිවරණ කොමසාරිස්‌ මහින්ද දේශප්‍රිය මහතා විසින් ඊට පසු දින එනම් 20 වැනිදා නිකුත් කිරීමට නියමිතය.

ඒ අනුව දෙසැම්බර් මස 04 හෝ 05 දින දෙකින් එකකදී බොහෝ විට රාජගිරිය මැතිවරණ මහලේකම් කාර්යාලයේ ප්‍රධාන ශාලාවේදී නාමයෝජනා පත්‍ර භාර ගැනීමට නියමිතය. නාමයෝජනා පත්‍ර භාර ගැනීමේ ගැසට්‌ නිවේදනය නිකුත් කර දින 16 කින් පසුව එළැඹෙන දිනයකදී නාමයෝජනා පත්‍ර භාර ගතයුතු වෙයි.

ඒ අනුව ජනාධිපතිවරණ ඡන්ද විමසීම ජනවාරි මස 07 හෝ 08 දින දෙකින් එකකදී පැවැත්වීමට ඉඩ ඇත.

ප්‍රචාරක කටයුතු සඳහා ඉකුත් ජනාධිපතිවරණවලදී අඩුම දින ගණනක්‌ ලබාදී ඇත්තේ 1982 සහ 1994 දීය. ඒ දින 33 බැගින්ය. එම ප්‍රමාණය මෙවරද ලබාදුනහොත් ඉහත දින දෙකින් එකකදී මැතිවරණය පැවැත්විය යුතු වෙයි. 


ජනාධිපතිවරණයේ නාම යෝජනා කැඳවීමේ හා ඡන්ද විමසීමේ දින තීරණය කිරීම මැතිවරණ කොමසාරිස්‌වරයාගේ අභිමතය පරිදි සිදු කිරීමට පනතින් බලය පවරා ඇත.