එක්සත් ජාතික පක්ෂයේ පාර්ලිමේන්තු මන්තී‍්‍ර ලක්ෂ්මන් කිරිඇල්ල මහතා ප‍්‍රකාශ කර සිටියේ සභානායකවරයෙකු විසින් ශ්‍රේෂ්ඨාධිකරණයක මතය ඇතුළත් ලියවිල්ලක් ප‍්‍රකාශයට පත් කිරීම නීති විරෝධී බවයි.  ඔහු පෙන්වා දෙන්නේ කතානායකවරයා විසින් එම කටයුත්ත සිදු කළ යුතුව තිබූ බවයි. 

පාර්ලිමේන්තුවේ අයවැය විවාදයට සමාගමීවයි මෙම කතාබහ ඇති විය.

ජනාධිපතිවරයාට තෙවන වරටත් ජනාධිපතිවරණයකට ඉදිරිපත් වීම සඳහා බාධාවක් නොමැති බවට වූ ශ්‍රේෂ්ඨාධිකරණයේ මතය පසුගියදා පාර්ලිමේන්තුව වෙත ඉදිරිපත් කළේ සභානායක අමාත්‍ය නිමල් සිරිපාල ද සිල්වා මහතාය. 


විපක්ෂයේ නියෝජිතයින් දිගින් දිගටම ප‍්‍රකාශ කර සිටියේ එවැනි මතයක් සභා නායකවරයෙකු විසින් ඉදිරිපත් කිරීම පිළිගත නොහැකි බවයි.   ඊට පිළිතුරු ලබාදුන් ආණ්ඩු පක්ෂයේ ප‍්‍රධාන සංවිධායක දිනේෂ් ගුණවර්ධන මහතා විපක්ෂයේ නීති තර්කය ප‍්‍රතික්ෂේප කළේය. 

කෙසේ වෙතත් විපක්ෂයේ ප‍්‍රධාන සංවිධායක ජෝන් අමරතුංග මහතා මෙහිදී කතානායකවරයාට දැනුම් දුන්නේ ශ්‍රේෂ්ඨාධිකරණයේ මතය ඇතුළත් පිටපත් පාර්ලිමේන්තු මන්තී‍්‍රවරුන් වෙත බෙදා දෙන ලෙසය. ඒ පිළිබඳ අවධානය යොමු කළ කතානායකවරයා ඊට පහසුකම් සැළසීමට පොරොන්දු විය.