මේ අතර තමිල්නාඩු මත් කුඩු ජාවාරම්කරුවන් පස් දෙනාට මරණ දඩුවම නියම කරමින් ලබාදුන් තීන්දුවේ පිටපතක්ද කොළඹ පිහිටි ඉන්දීය මහ කොමසාරිස් කාර්යාලය විසින් ලබා ගන්නා ලදී. ඉන්දීය විදේශ කටයුතු අමාත්‍යාංශයේ මාධ්‍ය ප‍්‍රකාශක සයිඞ් අක්බරුදීන් මහතා ප‍්‍රකාශ කරන්නේ නීතිමය පියවර ගැනීම සඳහා මෙම පිටපත ලබා ගත් බවය.
මෙතෙක් එම ධීවරයින් ඉන්දියාවේ බන්ධනාගාරයකට යොමු කිරීම සම්බන්ධයෙන් තීරණයක් ගෙන නොමැති බවද ඔහු ප‍්‍රකාශ කළේය.
කෙසේ වෙතත් පසුගියදා ශ‍්‍රී ලංකා ජනාධිපති මහින්ද රාජපක්ෂ මහතා සහ ඉන්දීය අග‍්‍රාමාත්‍ය නරේන්ද්‍ර මෝදි මහතා අතර සිදු කෙරුණු දුරකථන සංවාදයකදී මෙම සිරකරුවන් හුවමාරු කර ගැනීම සම්බන්ධයෙන් අදහස් හුවමාරු වී තිබුණි. මෙහිදී ඉන්දීය ධීවරයින් මදුරාසි බන්ධනාගාරයකට යොමු කිරීමට ජනාධිපතිවරයා කැමැත්ත පළ කළ බව ඉන්දීය මාධ්‍ය වාර්තා සඳහන් කළේය.
