එක්සත් ජාතික පක්ෂයේ රත්නපුර දිස්‌ත්‍රික්‌ මන්ත්‍රිනී තලතා අතුකෝරළ මහත්මිය විසින් ඉහත ප්‍රශ්නය විමසා තිබූ අතර ඊට ඊයේ ද ආරක්‍ෂක අමාත්‍යාංශය විසින් පිළිතුරු එවා නොතිබිණි.
ඉන්දීය ආරක්‍ෂක ඇමැතිවරයා ලෝක්‌ සභාවේදී සිදුකර ඇති ප්‍රකාශයකට අනුව ඉන්දියාව විසින් ශ්‍රී ලංකාවෙන් අවි මිලදී ගැනීමක්‌ සිදුකර තිබේද? එසේ නම් එම ගනුදෙනුව සිදු කළ වකවානුව, ඉන්දියාව මිලට ගත් ආයුධ වර්ගය, එමගින් ශ්‍රී ලංකාව ලැබූ ආදායම හා එම ගනුදෙනුවල විනිවිදභාවය තහවුරු කෙරෙන වාර්තාව කුමක්‌ද යන්න තලතා අතුකෝරළ මහත්මිය විමසා තිබිණි.
අග්‍රාමාත්‍ය සහ බුද්ධ ශාසන ඇමැතිවරයාට මෙම ප්‍රශ්නය යොමුකර තිබූ අතර පිළිතුරු ලබාදීම සඳහා ආණ්ඩු පක්ෂයේ සංවිධායක දිනේෂ් ගුණවර්ධන මහතා මාසයක කාලයක්‌ ඉල්ලා සිටියේය. එවිට නැඟී සිටි තලතා අතුකෝරළ මහත්මිය, "කථානායකතුමනි, මම මේ ප්‍රශ්නය අහලා මාස එකොළහක්‌ වෙනවා. අද හතරවැනි දවසටත් කල් ඉල්ලනවා. ඇයි මේ... මේක නිර්මල බෞද්ධ රටක්‌. ඒක නිසාද අවි ගනුදෙනුව ගැන කියන්නේ නැත්තේ....?
දිනේෂ් ගුණවර්ධන මහතා - නිර්මල බුද්ධාගම තියෙන රටක්‌ ලංකාව. බුද්ධාගම ලංකාවට ආ බුදුන් උපන් දේශය සමඟ අමනාපකම් හදන්න එපා.
කථානායක චමල් රාජපක්‍ෂ මහතා - මේ ප්‍රශ්නයට වහාම පිළිතුරු සපයන ලෙස ආරක්‍ෂක අමාත්‍යාංශයේ ලේකම්වරයාට නියෝග කරනවා.
