ජනාධිපති මහින්ද රාජපක්‍ෂ මහතා තෙවැනි වරටත් ජනාධිපති ධුරය සඳහා තරග කිරීම හා දෙවැනි ධුර කාලයේ වසර 04 ක්‌ ගත වූ පසු ජනාධිපතිවරණයක්‌ කැඳවීම සම්බන්ධයෙන් ශ්‍රේෂ්ඨාධිකරණයෙන් කර ඇති මත විමසීම ප්‍රසිද්ධියේ නොපැවැත්වීම පිළිබඳව ශ්‍රී ලංකා නීතිඥ සංගම් කාර්යාලයේ පැවැති මාධ්‍ය හමුවකට එක්‌වෙමින් පතිරණ මහතා එසේ කියා සිටියේය.
එහිදී වැඩිදුරටත් කරුණු දැක්‌වූ ඒ මහතා මෙසේ ද කියා සිටියේය.
''ජනාධිපතිවරයාගේ මත විමසීම සම්බන්ධයෙන් කරුණු දැක්‌වීමට අවස්‌ථාවක්‌ ලබා නොදී එය රහසිගතව සිදුකිරීම ගැන කනගාටුව හා කනස්‌සල්ල ප්‍රකාශ කරනවා. ශ්‍රේෂ්ඨාධිකරණයේ මතය ඔවුන් ජනාධිපතිවරයා වෙත පෞද්ගලිකව දන්වා යවයි. මේ අධිකරණ කටයුත්තට එක්‌වන්නේ එම විනිසුරුවරුන් පමණයි. මෙහි විනිසුරු මඬුල්ලට විනිසුරුවන් 05 දෙනකුට වැඩි පිරිසක්‌ එක්‌විය යුතුයි. මේ මත විමසීම සිදුකරන විනිසුරුවරුන්ට මේ ගැන ඉදිරිපත් වන පෙත්සම් විභාගයකට එක්‌වීමට නොහැකියි. එය සාමාන්‍ය ක්‍රියාදාමයයි. කෙසේ වුවත් මෙම මත විමසීම ප්‍රසිද්ධියේ කාටත් කරුණු දැක්‌විය හැකි ලෙසින් සිදු කළා නම් සාධාරණයි කියා කිව යුතුයි'' යනුවෙන් පැවසුවේය.
