වසර ගණනාවකට පසුව ශ්‍රී ලංකාවේ සංචාරය කරන සෙප් බ්ලැටර් මහතා ජනාධිපති මහින්ද රාජපක්ෂ මහතා හා ක්‍රීඩා ඇමැති මහින්දානන්ද අලුත්ගමගේ මහතා හමුවීමට ද නියමිත බව පැවසේ.
ලෝක පාපන්දු සභාපතිවරයා මේ වසරේදී ශ්‍රී ලංකාවට අමෙරිකානු ඩොලර් ලක්ෂ 7.5ක ප්‍රසාද දීමනාවක් ලබාදුන් අතර දංගොල්ල නව පාපන්දු සංකීර්ණයට හා කොළඹ හෙන්රි පේද්‍රික් ක්‍රීඩා පිටිය නවීකරණයට අමෙරිකානු ඩොලර් ලක්ෂ 10ක මුදලක් ලබා දුන්නේය. එම සියලු මුදල් ලෝක පාපන්දු සම්මේලනය වාර්ෂිකව ලබාදෙන අමෙරිකානු ඩොලර් ලක්ෂ 2.5ට අමතරව හිමිවීම විශේෂත්වයකි.
ඔහු ශ්‍රී ලංකාවට පැමිණෙන්නේ පිලිපීනයේ පැවැත්වෙන ආසියානු පාපන්දු සම්මේලනයේ විශේෂ සැසිවාරයකට සහභාගිවීමෙන් අනතුරුවය.
යාපනයේ අරියාලේ ක්‍රීඩාංගණය විවෘත කිරීම, ශ්‍රී ලංකාවේ පාපන්දු ලීග් සභාපතිවරු හා ලේකම්වරු ඇමැතීම බ්ලැටර් මහතාගේ සංචාරයේදී සිදු කිරීමට නියමිතය.
අරියාලේ ක්‍රීඩාංගණය ඉදිකිරීමට ලෝක පාපන්දු සම්මේලනය ඇමරිකානු ඩොලර් ලක්ෂ 4ක මුදලක් පිරිනමා තිබුණි.
ශ්‍රී ලංකාවට පැමිණීමෙන් අනතුරුව ඔහු දෙසැම්බර් 3වැනිදා සුරිච් බලා පිටත්වීමට නියමිතය.
බ්ලැටර් මහතාගේ මේ සංචාරය ඔහුගේ සිවුවැනි ශ්‍රී ලංකා ගමනයි. අවසන් වරට ඔහු ලංකාවට පැමිණ ඇත්තේ වසර 2006දී කළුතර වර්නන් ප්‍රනාන්දු ක්‍රීඩා පිටිය ඉදිකිරීමේ කටයුතු සඳහාය.
ලෝක පාපන්දු සම්මේලනයේ 8වැනි සභාපතිවරයා වන 78 වියැති සෙප් බ්ලැටර් මහතා 1998 සිට පිට පිට සිවුවතාවක්ම එම තනතුරට තේරී පත් වූවෙකි.
