මේ සම්බන්ධයෙන් එම සංගමය නිකුත් කළ නිවේදනය සම්පූර්ණයෙන් මෙසේය.
2014.10.29 වන දින ඌව පළාත් සභාවට අයත් මීරියබැද්ද කොස්ලන්ද වත්තේ සිදුවූ නාය යාමෙන් මියගිය පිරිස අතර එම ප්‍රදේශයේ පවුල් සෞඛ්‍ය සේවා නිලධාරිනිය වන ක්‍රිෂාන්ති ධම්මිකා මහත්මිය ඇතුළු ඇගේ දරුවන් දෙදෙනා ද විය.
මේ වනවිට එම ඛේදනීය සිදුවීම පිළිබඳ විවිධ අර්ථකතන ඉදිරිපත් කරමින් ඇත. ඒ හරහා ආණ්ඩුව හා බලධාරින් එම මරණ වලට වගකීමෙන් ගැලවීමට උත්සාහ දරමින් සිටී. එසේම එහි සම්පූර්ණ වැරැද්ද මියගියවුන් පිට සහ ප්‍රදේශයේ ජනතාව මත පැටවීමට උත්සාහ දරමින් ඇත.
ආණ්ඩුව කියන අන්දමට එම ප්‍රදේශය නාය යන බවට හඳුනාගෙන තිබුනා නම් හෝ අවදානම් ප්‍රදේශයක් බවට නම් කර තිබුණා නම්, කොස්ලන්ද වත්තේ පවුල් සෞඛ්‍ය මධ්‍යස්ථානයත්, පවුල් සෞඛ්‍ය සේවා නිලධාරිනියගේ නිල නිවාසයත් එම ස්ථානයේ පවත්වාගෙන යාමට හේතුවක් නොමැත. එසේම අදාල වගකිවයුතු ආයතන දැනුවත් වී තිබුණා නම් රජයේ ආයතනයක් වන පවුල් සෞඛ්‍ය මධ්‍යස්ථානය වෙනත් ආරක‍ෂාකාරී තැනකට ගෙන යා හැකිව තිබුණි. නමුත් එවැනි කිසිදු පූර්ව දැනුම් දීමක් කර නොතිබුණු බව අපට දැනගන්නට ලැබී ඇත. එසේ කර තිබුණා නම් 2014. 10. 29 වන දින පවුල් සෞඛ්‍ය සේවා නිලධාරිනිය එදින සායනය එම ස්ථානයේ පවත්වන්නේ නැත. එසේම ප්‍රදේශයේ ජනතාව එදින එම සායනයට පැමිණෙන්නේ නැත. එසේ වූවා නම් පවුල් සෞඛ්‍ය සේවා නිලධාරිනියගේ සහ ඇගේ දරුවන් දෙදෙනාගෙත් තවත් විශාල පිරිසකගේත් ජීවිත බේරා ගත හැකිව තිබුණි.
ඒ අනුව ප්‍රදේශයේ බලධාරින් සහ ආණ්ඩුව මේ මොහොතේ පවසන්නේ අසත්‍යයක් බව අප ඉතා වගකීමෙන් යුතුව ප්‍රකාශ කර සිටිමු.
එබැවින් දැන් කළයුත්තේ බොරුව වසා ගැනීමට තවත් බොරු නොකියා මියගිය අහිංසකයින් පිට වරද නොපටවා මියගිය අය වෙනුවෙන් වන්දි ලබා දී ඔවුන්ගේ ඉතිරි වී සිටින දරුවන් ඇතුළු අනෙකුත් අයගේ ජීවිත සුරක‍්ෂිත කිරීමට කටයුතු කිරීම බව අප ප්‍රකාශ කර සිටිමු.
කුසුමා ඩයස් - ප්‍රධාන ලේකම්
දීප්ති කෞෂිකා ජයතුංග - සභාපති
සමස්ත ලංකා පවුල් සෞඛ්‍ය සේවා නිලධාරිනියන්ගේ සංගමය
(ලංකා ඊ නිව්ස් )
