එක්සත් ජාතික පක්ෂය සහාය දක්වන වෙනත් පොදු අපේක්ෂකයෙකු ජනාධිපතිවරණයට ඉදිරිපත් වුවහොත් ඊට සහාය දිය හැකි නමුත් රනිල් වික්‍රමසිංහ මහතා ජනාධිපති අපේක්ෂකයා ලෙස ඉදිරිපත් වන්නේ නම් ඊට සහය දිය නොහැකි බවත් සෝභිත හිමියෝ සහ දෙමළ ජාතික සන්ධානයේ නායක ආර්. සම්බන්ධන් මහතා එ.ජා.ප.යට දැනුම් දී තිබේ.
මේ හේතුව නිසා ජනාධිපතිවරණයට ඉදිරිපත් කරනා අපේක්ෂකයා සම්බන්ධයෙන් එක්සත් ජාතික පක්ෂය තුළ ගැටලුවක් පැන නැගී ඇති අතර ඒ සම්බන්ධයෙන් තීරණයක් ගැනීමට නොහැකි තත්ත්වයක් උද්ගතව ඇතැයි පක්ෂ ආරංචි මාර්ග සඳහන් කරයි.
එසේම ජනාධිපතිවරණය වෙනුවෙන් පක්ෂය විසින් පත් කරනු ලැබූ ජී. 20 කමිටුවටද මේ සම්බන්ධයෙන් තීරණයක් ගත නොහැකිව කල් යමින් පවතින බවද පක්ෂයේ ප්‍රකාශකයෙකු කීවේය. ඉකුත් බදාදා පාර්ලිමේන්තුවේ පැවැති එම කමිටු රැස්වීමද තීරණයකින් තොරව අවසන්ව තිබේ.
ජී. 20 කමිටුව මේ වන විට අවස්ථා පහකදී රැස්ව ඇති අතර පක්ෂ නායකත්වයට මේ අවස්ථා පහේදීම අපේක්ෂකයා සම්බන්ධයෙන් ස්ථීර පිළිතුරක් දීමට නොහැකිව ඇත. පක්ෂයේ කොටසක් රනිල් වික්‍රමසිංහ මහතා ජනාධිපතිවරණයට ඉදිරිපත් විය යුතු බව දන්වන අතර තවත් පිරිසක් පොදු අපේක්ෂකයෙකුට සහාය දිය යුතු බවට ප්‍රකාශ කිරීම නිසා මේ ගැටලුව පැන නැගී ඇත.
