දණ හිසෙන් පහළ පාදයක් අහිමි ක්‍රීඩකයන්ගේ දුර පැනීමේ (T42) ඉසව්වේදී ප්‍රසන්න ජයලත් මීටර් 5.05ක දක්ෂතාවකින් රිදී පදක්කම දිනාගත් අතර දණහිසෙන් පහළ පාදයක් අහිමි (T44) ඉසව්වේදී දුමීර මධුරංග මීටර් 5.58ක දක්ෂතාවකින් ලෝකඩ පදක්කම හිමිකර ගත්තේය.
එය ආසියානු පැරා ක්‍රීඩා උළෙලේ නව තරග වාර්තාවක් ලෙසද සටහන් විය. අතේ මැණික් කටුවට ඉහළින් ආබාධිතවු (T47) ක්‍රීඩිකාවන් අතර මීටර් 200 තරගයේදී තත්පර 28.77කින් තරගය නිමකළ අමා පල්ලියගුරු ලෝකඩ පදක්කමක් දිනාගැනීමට සමත් වූවාය.
ආසියානු පැරා ක්‍රීඩා උළෙලේ රෝද පුටු ටෙනිස් තරගවලදී ගාමිණී දිසානායක 2-0කින් පාකිස්තානයේ අතාෆ් රහ්මාන් පරාජය කළද මූලික වටයේ දෙවැනි තරගයේදී ජපානයේ කුනාඩා සින්ගෝ වෙතින් පරාජයට පත්විය.
රෝද පුටු ටෙනිස් තරගයකට එක්වු උපාලි රාජකරුණා 2-1ක් ලෙස මැලේසියාවේ ෆාහිම් අරීෆ් හමුවේ පරාජයට පත්විය. දණ හිසෙන් පහළ පාදයක් අහිමි (S10) ක්‍රීඩකයන් අතර මීටර් 50 නිදහස් ආර පිහිනුම් තරගයේදී ජනක කපුවන්ගෙදර තත්පර 28.80කින් හත්වැනි ස්ථානයට පත්විය.
එහි රන් පදක්කම තත්පර 25.33කින් චීනයේ ලින් ෆොරොන්ග් දිනාගත්තේය. වැලමිටෙන් පහළ අතක් අහිමි ටේබල් ටෙනිස් ක්‍රීඩකයන් අතර පිරිමි ඒකළ මුලික වටයේ මුල්ම තරගයේදී දිනේෂ් සිල්වා 2-1කින් තායිපේ හී ලියාඩ් පරාජය කළ අතර දෙවැනි තරගයේදී ඩ්ම් රාජෙස් 3-0කින් පරදවා ඉදිරියට පැමිණියේය.
මැණික් කටුවෙන් පහළ අතක් අහිමි ක්‍රීඩකයන් අතර පිරිමි ඒකළ මුලික වටයේ තරගයකදී සමන් විජයලත් 3-0කින් මැලේසියානු ක්‍රීඩකයා හමුවේ පරාජයට පත්විය. එම වටයේ තවත් තරගයකදී අතුල ජයසිංහ 3-0කින් ඉන්දුනිසියානු ක්‍රීඩකයා හමුවේ පරාජයට පත්විය.
ආසියාන පැරා ක්‍රීඩා උළෙල මේ මස 24වැනිදා දක්වා පැවැත්වෙයි.
