මෙම වැඩමුළුව පැවැත්වීමට ඉඩ ලබා දුන්නොත් ඊට නියමිත වූ හෝටලය කුඩු කර දමන බවට පෙරේදා රාත්‍රියේ සිට එම හෝටලයට දුරකථන තර්ජන එල්ල වී තිබු අතර ඊයේ පෙරවරුවේ යතුරු පැදියකින් ආ පුද්ගලයෙක්‌ තර්ජනාත්මක ලිපියක්‌ හෝටල බලධාරීන්ට ලබා දී ඇත.
එම නිසා අදාළ හෝටලයේ එම වැඩමුළුව නොපවත්වන ලෙස හෝටල බලධාරීන් වැඩමුළුව සංවිධානය කළ ට්රාන්ස්පේරන්සි ඉන්ටර්නැෂනල් ශ්‍රී ලංකා ආයතනයටද බලපෑම් කර තිබිණ.
වෙනත් හෝටලයකට
ඊයේ උදැසන මාධ්‍යවේදීන් විශාල පිරිසක්‌ එම හෝටලයට පැමිණි අතර ඔවුන් වෙනත් වාහන මගින් ආරක්‍ෂා සහිතව කොළඹ නගරයේ වෙනත් හෝටලයකට රැගෙන ගොස්‌ අදාළ වැඩමුළුව පැවැත්වීමට සංවිධායකයෝ කටයුතු කළහ.
රටේ සිදුවන දූෂණ හා වංචා පිළිබඳව ගවේෂණාත්මක මාධ්‍ය භාවිතය කළ යුතු අයුරු සම්බන්ධයෙන් මෙම වැඩමුළුව පැවැත්විණි.
'රාවය' පුවත්පතේ කර්තෘ වික්ටර් අයිවන්, දකුණු ආසියානු නිදහස් මාධ්‍ය සංසදයේ හිටපු සභාපති ලක්‍ෂ්මන් ගුණසේකර, නිදහස් මාධ්‍ය ව්‍යාපාරයේ කැඳවුම්කරු සුනිල් ජයසේකර, විදේශීය මාධ්‍යවේදීන්ගේ සංගමයේ සභාපති අමල් ජයසිංහ, ට්රාන්ස්පේරන්සි ආයතනයේ විධායක අධ්‍යක්‍ෂ එස්‌. රනුග්ගේ සහ සන්නිවේදන අධ්‍යක්‍ෂ ශාන් විඡේතුංග යන මහත්වරු ඇතුළු විශාල පිරිසක්‌ මෙම වැඩමුළුවට එක්‌ව සිටියහ.
වැඩමුළුව පවත්වාගෙන යන අතරේ ද මාධ්‍යවේදීන්ගේ සහ සංවිධායකයන්ගේ දුරකථනවලට තර්ජනාත්මක ඇමතුම් සහ කෙටි පණිවිඩ ලැබිණි.
වැඩේ අතාරින්නෙ නැහැ :
කෙසේවුවද, ආරක්ෂක අංශවලට සම්බන්ධ කණ්ඩායම් වැඩසටහන කඩාකප්පල් කිරීමට කොපමණ උත්සාහ කළත් මෙම වැඩසටහන සාර්ථකව පවත්වා අවසන් කිරීමට සංවිධායකයනට හැකිවූ බව නිදහස් මාධ්‍ය ව්‍යාපාරයේ සුනිල් ජයසේකර මහතා සඳහන් කළේය.
කොපමණ තර්ජන එල්ල්වුවත් ඉදිරියේදීත් මෙවැනි වැඩසටහන් පවත්වන බවද සුනිල් ජයසේකර මහතා කියා සිටියේය.
ආණ්ඩුව ලැජ්ජා වෙන්න ඕනේ:
වැඩසටහනට සහභාගි නොවන ලෙස පවසමින් තමන්ටත් කෙටි පණිවිඩයක් ලැබුණු බව වැඩසටහනේ ප්‍රධානත්වය දැරූ ජ්‍යෙෂ්ඨ මාධ්‍යවේදී වික්ටර් අයිවන් මහතා පැවසීය
"හරිම අශීලාචාර තත්වයක්. මගේ දුරකථනයටත් ඇවිල්ලා තියෙනවා කෙටි පණිවිඩයක් ආවොත් මරණවා කියලා," යනුවෙන් ඔහු සඳහන් කළේය.
"මේවා සාමාන්‍යයෙන් සිදුවෙන්න බෑනේ?. මේක සංවිධානාත්මක බුද්ධි අංශය කළ වැඩක්, ආණ්ඩුව ලැජ්ජා වෙන්න ඕනේ."
මාධ්‍යවේදීන්ට තමන්ගේ දැනුම වැඩිදියුණු කිරීමට තිබෙන අයිතියට බාධා කිරීමට ආණ්ඩුව දරන උත්සාහය අශීලාචාර ක්‍රියාවක් බවද වික්ටර් අයිවන් පැවසීය.
"මේවා කරන්න නෙමෙයි මිනිස්සු ආණ්ඩු පත්කරන්නේ.
පැමිණිල්ලක් ලැබුනහොත් පමණයි :
ජනමාධ්‍යවේදීන්ට මරණ තර්ජන කළ බවට රජයේ බුද්ධි අංශවලට එල්ල වන චෝදනා පිළිබඳව විමසූ විට පොලිස් මාධ්‍ය ප්‍රකාශක අජිත් රෝහණ කියා මහතා සිටියේ, ඒ පිළිබඳව පැමිණිල්ලක් ලැබුනහොත් පරීක්ෂණ ආරම්භ කරන බවයි.
එහෙත් මේ පිළිබඳව පොලිස්පතිවරයාට ඍජුවම පැමිණිලි කළ බව, වැඩසටහන සංවිධානය කළ ට්රාන්ස්පේරන්සි ඉන්ටර්නැෂනල් ශ්‍රී ලංකා ආයතනය පවසයි.
