උත්සවය වහා අවලංගු කරන ලෙසත්, එසේ නොකළහොත් වධ හිංසාවලට ලක් කොට මරා දමන බවටත් ඊයේ  (14) සවස 5.00ට පමණ මෙම වැඩසටහනේ මාධ්‍ය පුහුණුකරුවකු හා උත්සවයේ සංවිධායකයකු වන මාධ්‍යවේදී ජයසිරි ජයසේකර මහතාට  අනන්‍යතාව හෙළි නොකළ පුද්ගලයකු විසින් 0756245489 දරන දුරකථනය ඔස්සේ තර්ජනය කර තිබේ. 


එකී දුරකථන අංකය ඔස්සේම ට‍්‍රාන්ස්පේරන්සි ආයතනයේ ජ්‍යෙෂ්ඨ කළමනාකරු ශාන් විජේතුංග මහතාගේ ජංගම දුරකථනයටද තුන් වතාවක්ම ඇමතුම් ලබාදී ඇතත්, ඔහු එම ඇමතුම්වලට පිළිතුරු දී නැත. 


අදාළ උත්සවයට සහභාගී වීමට නියමිත, වයඹ ජනමාධ්‍යවේදීන්ගේ සංගමයේ සභාපති ජනූර් කිචිලාන් මහතාටද ඉහත දුරකථන අංකය ඔස්සේම මරණ තර්ජන එල්ල කර තිබේ.

ඊයේ (14) රාත‍්‍රී 7.30ට පමණ ජයසිරි මහතා ගේ ජංගම දුරකථනයට 0725436266 අංකය ඔස්සේ එවූ කෙටි පණිවුඩයක, අද 15 දා අදාළ රැස්වීම අවලංගු කර ඇති බවත්, එම එල්ටීටීඊ රැස්වීමට සහභාගී නොවන ලෙසත්, එසේ ගියහොත් ප‍්‍රහාරයට ලක් වන බවත් සඳහන් කර ඇති අතර පණිවුඩකරු ලෙස සඳහන් කර ඇත්තේ ‘රට බේරාගත් දේශපේ‍්‍රමී බලකාය’ යනුවෙනි. 


මෙම පණිවුඩයම උත්සවයට සහභාගී වීමට නියමිත මාධ්‍යවේදීන් කිහිප දෙනෙකුටම ලැබී තිබේ.

මෙම උත්සවයට ලංකාවේ විවිධ පළාත්වල සිංහල සහ දෙමළ භාෂාවෙන් මාධ්‍යකරණයේ යෙදෙන ජනමාධ්‍යවේදීන් 60 දෙනෙකු සහභාගී වීමට නියමිත අතර, උත්සවයේ ප‍්‍රධාන ආරාධිත දේශකයන් වන්නේ රාවය පුවත්පතේ උපදේශක කර්තෘ වික්ටර් අයිවන් සහ ප‍්‍රංශ පුවත් සේවයේ කොළඹ ප‍්‍රධානී අමල් ජයසිංහ යන මහත්වරුන් ය.

ට‍්‍රාන්ස්පේරන්සි ආයතනය විසින් සංවිධානය කළ මෙම පුහුණු වැඩසටහනේ වැඩමුළු දෙකකට ආරක්ෂක අංශවල අනුග‍්‍රහය ලැබූ උද්ඝෝෂකයන්ගෙන් එල්ල වූ තර්ජන නිසා එම වැඩමුළු අවලංගු කිරීමට සිදු වූ අතර පසුගිය මාස කිහිපය ඇතුළත ජනමාධ්‍යවේදීන්ගේ පුහුණු වැඩසටහන්වලට බාධා එල්ල වූ එවැනි අවස්ථා කිහිපයක්ම වාර්තා විය.

මෙම තර්ජනවලට ආරක්ෂක අංශ සම්බන්ධ බව මුලදී ආරක්ෂක බලධාරීන් ප්‍රතික්ෂේප කළ නමුත් පසුව කළ ප්‍රකාශවලින් ඒ බව තහවුරු වි තිබේ

අදාළ SMS පණිවුඩය මෙසේය-

The meeting which is orgarnized for the journalists at janaki hotel on 15.10.2014 at 10.00am is cancelled. do not attend for this LTTE meeting. you will be attacked. - RATA BERAGATH DESHAPREMI BALAKAYA.