අලුතින් ඉදිකෙරුණු යාපනය දුම්රිය ස්ථානය ද අද ජනාධිපති මහින්ද රාජපක්ෂ මහතා අතින් විවෘත වනු ඇත. එය නවීන විදුලි සංඥා පද්ධතියකින් ද සමන්විත වේ.
උතුර දුම්රිය මාර්ගය තැනීම ඉන්දීය 'ඉර්කෝන්' සමාගම විසින් සිදු කරනු ලබන අතර ඉදිරියේදී කන්කසන්තුරය දක්වා ම මෙම දුම්රිය ධාවනය කරවීම රජයේ අරමුණ වේ.
පසුගිය යුද සමයේ යාල්දේවී දුම්රිය වවුනියාව බලා ධාවනය කෙරිණ . වසර 24කට පසුව යාල්දේවි දුම්රිය යාපනය දක්වා ගමන් කිරීමේදී යුද්ධයෙන් විනාශ වී තිබූ දුම්රිය ස්ථාන හා දුම්රිය මාර්ග සම්පූර්ණයෙන්ම අලුත්වැඩියා කිරීමෙන් පසුය.
ඉන්දියානු රජයේ ඩොලර් මිලියන 183ක ණය මුදලක් දුම්රිය මාර්ගයේ ඉදිකිරීම සඳහා ශ්‍රී ලංකා රජයට ලබාදී තිබුණි.
ඉන්දියාවේ ඉර්කෝන් සමාගම සමඟ පැවැති එකඟතාවය මත උතුරු දුම්රිය මාර්ගය කොටසින් කොටස ඉදි කළේය. මෙහි පළමු අදියර යාල් දේවි දුම්රිය කාන්ඩිකුලම් දුම්රිය ස්ථානය දක්වා ගමන් කෙරිණි . ඉන්පසු ඕමන්තේ දුම්රිය ස්ථානය දක්වා ගමන් ඇරඹිණ .
අද වන විට උතුරු දුම්රිය මාර්ගයේ විනාශ වී තිබූ දුම්රිය ස්ථාන නවීකරණය කර අවසන්ව ඇත.
උතුරු දුම්රිය මාර්ගයේ මංගල ගමන සිදුව ඇත්තේ 1956 අපේ‍්‍රල් 23 වනදාය. 1983න් පසු උතුරේ අර්බුදය උග‍්‍ර අතට පත්වීමත් සමගම කොළඹ සිට වවුනියාව දක්වා දුම්රිය ධාවනය සීමා විය.
