එම ආයතනය 2012 වසරේදී රුපියල් කෝටි 36 ක්‌ ලාභ ලබා ඇතැයි ද කී දිනේෂ් ගුණවර්ධන මහතා 2015 දී රුපියල් කෝටි 11 ක සහ 2016 දී රුපියල් කෝටි 16 ක ශුද්ධ අතිරික්‌තයක්‌ අපේක්‌ෂා කරන බව ද පැවැසුවේය.

ශ්‍රී ලංකා ක්‍රිකට්‌ ආයතනයේ සෘජු සේවකයන් 222 ක්‌ සිටින බව ද සේවක වැටුප් සඳහා මසකට රුපියල් දෙකෝටි අසූපන් ලක්‌ෂයක්‌ ආයතනය විසින් වැය කරන බව ද කී දිනේෂ් ගුණවර්ධන මහතා එක්‌ සේවකයකු වෙනුවෙන් මසකට රුපියල් එක්‌ලක්‌ෂ විසිදහසක වියදමක්‌ දරන බවද කීවේය.

සේවකයන්ගේ මූලික වැටුප් සඳහා රුපියල් එක්‌කෝටි හැත්තෑහය ලක්‌ෂයක්‌, වාහන නඩත්තු, ඉන්ධන සහ ගමන් වියදම් දීමනා සඳහා රුපියල් ලක්‍ෂ 41 ක්‌, ආහාර සහ විශේෂ දීමනා වෙනුවෙන් රුපියල් ලක්‍ෂ හතළිස්‌ හයක්‌, සේවක අර්ථසාධක අරමුදල සඳහා රුපියල් ලක්‍ෂ දහඅටක්‌, සේවක බාරකාර අරමුදල සඳහා රුපියල් ලක්‍ෂ හතරක්‌ ලෙස මසකට ක්‍රිකට්‌ ආයතනය විසින් සේවකයන් වෙනුවෙන් වැය කරන බව ද දිනේෂ් ගුණවර්ධන මහතා කීවේය.

ශ්‍රී ලංකා ක්‍රිකට්‌ ආයතනය පසුගිය මැයි 31 දා දක්‌වා ජාත්‍යන්තර ක්‍රිකට්‌ කවුන්සිලයට ණය වාරික ලෙස රුපියල් කෝටි 4 ක්‌, ලංකා බැංකුවට රුපියල් කෝටි 3 ක්‌ ගෙවා තිබෙන බව ද කී දිනේෂ් ගුණවර්ධන මහතා ලංකා බැංකුවට රුපියල් පනස්‌ දෙකෝටි හෑත්තෑ ලක්‌ෂයක්‌ වාරික ණය ලෙස ගෙවීමට තිබෙන බව ද කීය.

කොළඹ දිස්‌ත්‍රික්‌ (එජාප) මන්ත්‍රි රවී කරුණානායක මහතා ඇසූ පැනයකට පිළිතුරු දෙමින් දිනේෂ් ගුණවර්ධන මහතා ඉහත ලේඛනය සභාව හමුවේ තැබුවේය.


(දිවයින)