ස්‌ථාවර නියෝග 2 3/2 යටතේ දිසානායක මහතා විසින් ඉදිරිපත් කිරීමට සිටි එම ප්‍රකාශය සංශෝධනය කර විධිමත් අයුරින් ගෙන එන්නැයිද නියෝජ්‍ය කථානායකවරයා කීවේය.
පාර්ලිමේන්තුවේ කටයුතු ආරම්භ වූ පසුව අනුර දිසානායක මහතා රීති ප්‍රශ්නයක්‌ මතු කරමින් තම විශේෂ ප්‍රකාශය ඉදිරිපත් කිරීමට ඉඩ ලබා නොදෙන්නේ මන්දැයි විමසා සිටියේය.
නියෝජ්‍ය කථානායක - ඔබතුමා ඉදිරිපත්කර තිබූ විශේෂ ප්‍රකාශයට අදාළව කථානායකවරයා ලබාදුන් තීන්දුව ලේකම් මණ්‌ඩලය විසින් ඔබේ කාර්යාලයට යොමුකර තිබෙනවා.
දිසානායක මහතා - වෙනදාට එවැනි ලේඛන සභා ගැබේදීයි භාර දෙන්නේ. ඒ නිසයි මම ප්‍රශ්න කළේ. කෙසේ වෙතත් මම අහලා තියෙන්නේ බ්‍රිතාන්‍යයේ ශ්‍රී ලංකා මහ කොමසාරිස්‌වරයාට පහර දීමක්‌ සිදු වුණා ද නැද්ද කියලයි.
නියෝජ්‍ය කථානායක -ස්‌ථාවර නියෝගවලට අනුව එවැනි ප්රකාශයක් කරන්න බැහැ.
දිසානායක මහතා - මම මේ ප්‍රකාශය මගින් විදේශ ඇමැතිවරයාගෙන් අසා තිබෙන්නේ ක්‍රිස්‌ නෝනිස්‌ මහතාට මන්ත්‍රීවරයෙක්‌ පහර දුන්නාද නැද්ද කියලයි. පහරදීමක්‌ සිදුවී නැත්නම් එවැන්නක්‌ වී නැත කියා ඇමැතිවරයාට කිව හැකියි. පහරදීමක්‌ සිදුව ඇත්නම් ඒ ගැනත් කියන්න පුළුවන්.
නියෝජ්‍ය කථානායක - ස්‌ථාවර නියෝග අනුව ප්‍රශ්න කළ හැකි දේ සහ නොකළ හැකි දේ තියෙනවා. එය අධ්‍යයනය කර ඊට අනුකූල ලෙස විධිමත් ක්‍රමවේදයකට අනුව මෙම ප්‍රකාශය ඉදිරිපත් කරන්න.
