තම ඉල්ලීම් සඳහා පිළිතුරු ලැබෙන තුරු මෙම වර්ජනය අඛණ්ඩව කි‍්‍රයාත්මක කරන බව එම සංගමයේ සභාපති එස්.පී. විතානගේ මහතා කියා සිටියේය.
මේ අතර දුම්රිය වෘත්තිය සමිති එකමුතුවේ නියෝජිතයින් සහ මුදල් අමාත්‍යාංශ ලේකම්වරයා අතර ඊයේ පස්වරුවේ පැවති සාකච්ජාව ද ප‍්‍රතිඵලදායක නොවිය.
දෙසතියක් ඇතුළත විසඳුම් ලබා දෙන බවට මුදල් අමාත්‍යාංශ ලේකම්වරයා ඉදිරිපත් කළ ලිඛිත පොරොන්දුවට වෘත්තීය සමිති නියෝජිතයින් එකග නොවිය.
මේ සම්බන්ධයෙන් කළ විමසීමකදී දුම්රිය වෘත්තීය සමිති එකමුතුවේ කැඳවුම්කරු වන ජානක ප‍්‍රනාන්දු මහතා ප‍්‍රකාශ කළේ කරුණු කිහිපයක් හේතුවෙන් මුදල් අමාත්‍යාංශ ලේකම්වරයාගේ පොරොන්දුව ප‍්‍රතික්ෂේප කළ බවයි. ඒ හේතුවෙන් ඉදිරියටත් වර්ජනය මෙහෙයවන බවද ඔහු ප‍්‍රකාශ කළේය.
කෙසේ වෙතත් දුම්රිය වර්ජනය අද දිනයේද කි‍්‍රයාත්මක වුවහොත්, ආදායම් අහිමි වීම රුපියල් මිලියන හතළිහක් පමණ දක්වා ඉහළ යනු ඇති බවට අපේක්ෂා කෙරේ.
දුම්රිය දෙපාර්තමේන්තුවේ ප‍්‍රකාශකයෙකු සඳහන් කළේ ඊයේ දිනයේදී පමණක් රුපියල් මිලියන විස්සකට ආසන්න ආදායමක් දෙපාර්තමේන්තුවට අහිමි වූ බවයි.
තවද, එම ගණන් නිෂ්චිත තක්සේරුවකින් තහවුරුවූවක් නොවන බවත්, එවැනි ගණනයකදී එය තවදුරටත් ඉහළ යා හැකි බවත් ඔහු ප‍්‍රකාශ කළේය.
පෙර වෙන් කර තිබූ ගමන් වාර අහෝසි කිරීම සහ භාණ්ඩ ප‍්‍රවාහන සේවාවන් මුළුමනින්ම අවළංගු කිරීමට සිදුවීම, අදායම විශාල පරාසයකින් අහිමි වීමට ප්රධාන හේතුවයි.
වැටුප්, උසස් වීම් ඇතුලූ ඉල්ලීම් කිහිපයක් මුල් කර ගනිමින් දුම්රිය රියදුරන්, නියාමකයින්, ස්ථානාධිපතිවරුන් ඇතුළු වෘත්තීන් කිහිපයක සාමාජිකයින් මෙලෙස වර්ජනයේ නිරතව සිටියි.
වැඩවර්ජනය හේතුවෙන් දිවයිනේ සෑම දුම්රිය ස්ථානයක්ම පැවතියේ පාළු ස්වභාවයකි. ගාල්ල, අනුරාධපුර සහ හැටන් දුම්රිය ස්ථානවල දසුන් පහත දැක්වේ.
(වී එෆ් එම් )
