ශී‍්‍ර ලංකාවේ ගුරුවරුන්ට අද මුහුණදීමට සිදුවී ඇති තත්වයන් ජාත්‍යන්තර පිළිගැනීම්වලටද පටහැනි බව මේ සබ්බන්ධයෙන් අදහස් දක්වමින් එම සංගමයේ ප‍්‍රධාන ලේකම් ජෝශප් ස්ටාර්ලින් මහතා පෙන්වා දෙයි. වැඩිදුරටත් අදහස් දක්වමින් ඒ මහතා පෙන්වා දෙන්නේ අවස්ථා ගණනාවකදී තමන් ඉදිරිපත් කළ ඉල්ලීම් ආණ්ඩුව විසින් නොසලකා හැරීම සිදු කළ බවයි.
ලෝක ගුරු දිනය සම්බන්ධව යුනෙස්කෝ සංවිධානය මෙවර කියලා තියෙන්නේ ගුරුවරුන් සඳහා කෙරෙන ආයෝජනය අනාගතය සඳහා කෙරෙන ආයෝජනයක් කියලා. ඔවුන් සඳහන් කරලා තියෙනවා පැහැදිළිව ගුරුවරුවන්ගේ සේවා තත්ත්වයන්, පුහුණුවීම්, ගුරුවරුන් සඳහා සුබසාධනය පිළිබඳ වැඩි අවධානයක් යොමු කළොත් තමයි 2015 සංවර්ධන ඉලක්ක සපුරා ගත හැක්කේ කියලා. අද ගුරුවරුන් සඳහා ආයෝජනය කෙසේ වෙතත් අද ලංකාවේ ගුරුවරු අපි ගත්තොතත් විශේෂයෙන් විදුහල්පතිවරුන්ට 2008 සිට වසර හයක් තිස්සේ උසස්වීම් ලබාදී නැහැ. එසේම ගුරුවරුන්ට 2010 සිට වසර හතරක් තිස්සේ උසස්වීම් ලබාදී නැහැ.
වැටුප් සම්බන්ධයෙන්ද ගුරුවරුන්ට අසාධාරණයක් සිදුව ඇතැයි ජෝශප් ස්ටාර්ලින් මහතා මෙහිදී පෙන්වා දුන්නා.
1998 සිට ගුරුවරුන්ගේ වැටුප් විෂමතවක් ඇති වී තිබෙනවා. එම වැටුප් විෂමතා ඉවත් කිරීමට රජය කිසිදු පියවරක් ගෙන නොමැති බවද ඔහු පැවසුවා. එසේම 2009 වර්ෂයේදී ආණ්ඩුව අතිවැටුප් යෝජනාවක් ගෙන ආවා. නමුත් එයද කි‍්‍රයාත්මක නොකළ බවයි ජෝශප් ස්ටාලින් මහතා පවසන්නේ. එසේම 1994දී ගුරු සේවා ව්‍යවස්ථාව සහ විදුහල්පති සේවා ව්‍යවස්ථාව සංශෝධනය කර නව සේවා ව්‍යවස්ථාවක් ගෙන ඒමට ජ්‍යෙෂ්ඨ අමාත්‍යවරයාගේ ප‍්‍රධානත්වයෙන් පත් කළ කමිටුවේ වාර්තාව ගැන කිසිදු සඳහන් නොමැති බවත් ඔහු පෙන්වා දුන්නා.
ඔක්තෝබර් 6 ලෝක ගුරු දිනයට පෙර ගුරුවරුන්ගේ උසස්වීම් සහ මෙම ගැටලු සඳහා විසඳුම් ලබාදිය යුතු බවට පසුගිය 23 වැනිදා සමුළුවක් තබා තීරණයක් ගත්තා. ඒ අනුව මුලින්ම පළාත් මට්ටමින් උද්ඝෝෂණ පැවැත්වීමට කටයුතු යොදා තිබෙන බවත් එහි පළමු පියවර අද දිනයේ යාපනයෙන් ආරම්භ කරන බවත් ජෝශප් ස්ටාලින් මහතා පැවසුවා.
(මූලාශ්‍රය නෙත් )
