කෙටි කලක් රෝගාතුරව සිටි උන්වහන්සේ අපවත් වන විට 99 වැනි වියේ පසුවිය. අපවත් වන විට උන්වහන්සේ වැඩ සිටියේ කොල්ලූපිටිය වාළුකාරාම විහාරස්ථානයේය.
බෙල්ලන ශ‍්‍රී ඥානවිමල මහනාහිමියන්ගේ ආදාහන පූජෝත්සවය සිදුකරන ආකාරය පිළිබඳ අද දිනයේ තීරණය කරන බව කෝට්ටේ කල්‍යානි සාමග‍්‍රී ධර්ම මහා සංඝ සභාව සඳහන් කරයි.
අනගාරික ධර්මපාලතුමන් ගෙන ගිය වැඩපිළිවෙල ඉදිරියට ගෙනයාම සඳහා උන්වහන්සේ 1940 දශකයේ ඉන්දියාවේ ධර්මදූත සේවාවේ නිරත වුණි.
50 දශකයේ සිට 80 දශකය පමණ වනතුරු බෙල්ලන ශ‍්‍රී ධර්මපාල පිරිවනේ පරිවනාධිපති ධූරය උසුලමින් උන්වහන්සේ සුපේෂල ශික්‍ෂාකාමී භීක්‍ෂුන් වහන්සේලා දහස් ගණනක් ශාසනයට දායාද කළහ.
එම කාලවකවානුවේ දී සිය ධනය වැය කරමින් නාගොඩ ශ‍්‍රී සෝභිත සංඝාරාම විහාරස්ථානය ඉදිකිරීම ද උන්වහන්සේගේ ශාසනික සේවාවේ සුවිශේෂි කටයුත්තකි.
ඥානවිමල මහනාහිමියන් ලන්ඩනයේ, තේම්ස් භාවනා මධ්‍යස්ථානය මුල් කර ගනිමින් කලක් ධර්මදූත සේවාවේ නිරත වුණා. ඥානවිමල මහනාහිමියන් ජ්‍යෝතිශය පිළිබඳව ද දැනුම් සම්භාරයකින් හෙබි විශාරදයෙකු ලෙස ප‍්‍රකටය.
පාලී, සංස්කෘත, ඉංග‍්‍රීසි ඇතුළු භාෂා කිහිපයක් පිළිබඳ හසල දැනුමකින් හෙබි උන්වහන්සේ ධර්ම ශාස්ත‍්‍රීය ග‍්‍රන්ථ රැසක් ද රචනා කර ඇත. ජීවන රටාව සහ සසර පැවැත්වම, පෙනෙන ලොව තුල නොපෙනන ලොවක් යන ග‍්‍රන්ථ ද්විත්වය ඒ අතරින් බොහෝ දෙනාගේ කථා බහට ලක්වුණි.
