ලෝක ළමා දින සැමරුම් උත්සවය අද මහරගම ජාතික තරුණ සේවා සභා පරිශ්‍රයේ දී පැවැත්වීමට නියමිතය.
ළමා සංවර්ධන සහ කාන්තා කටයුතු අමාත්‍ය තිස්ස කරල්ලියද්ද මහතා පවසුවේ මෙම උත්සවය අද උදෑසන ජනාධිපති මහින්ද රාජපක්ෂ මහතාගේ ප්‍රධානත්වයෙන් පැවැත්වෙන බවයි.සෙනෙහස දී අප රකින්න යන තේමාව යටතේ මෙවර ලෝක ළමා දිනය සැමරීමට කටයුතු යොදා තිබේ.
එමෙන්ම ළමා දිනය වෙනුවෙන් තවත් වැඩසටහන් රැසක් අද දිනය තුළ ක්‍රියාත්මක වන බව තිස්ස කරල්ලියද්ද අමාත්‍යවරයා පැවසුවේය.
එසේම දෙහිවල ජාතික සත්වෝද්‍යානයේ සහ පින්නවල අලි අනාථාගාරය අද දිනය තුළ කුඩා ළමුන්ට සහ වැඩිහිටියන්ට නොමිලේ නැරඹීමේ අවස්ථාව ලබා දී තිබේ."කිසිවෙකු අත නොහරින එකම එක සමාජයක්‌" යන තේමාව යටතේ මෙවර ජාත්‍යන්තර වැඩිහිටි දිනය සමරනු ලබයි.
සත්වෝද්‍යාන දෙපාර්තමේන්තුව පැවසුවේ වයස අවුරුදු 12 න් පහළ කුඩා දරුවන් සහ වයස අවුරුදු 60 ට වැඩි ජ්‍යෙෂ්ඨ පුරවැසියන් සඳහා මෙම අවස්ථාව ලබා දෙන බවයි.
එමෙන්ම ලෝක ළමා දිනය වෙනුවෙන් දෙහිවල සත්වොද්‍යානයේ සහ පින්නවල අලි අනාථාගාරයේ දී දරුවන් වෙනුවෙන් විශේෂ වැඩසටහන් රැසක් පැවැත්වීමට කටයුතු යොදා ඇති බවද වාර්තා වෙයි.
