මෙය අද (27) සහ හෙට යන දෙදින තුළ මීගමුව කුඩාපාඩුව ‘රානි බීච් රිසෝට්' හි පැවැත්වීමට නියමිතව තිබූණි.

මෙම වැඩමුළුව සංවිධානය කර තිබුනේ ශ්‍රී ලංකාවේ වෘත්තීය වෙබ් මාධ්‍යවේදීන් අන්තර්ජාල ආරක්ෂණ කටයුතු සම්බන්ධයෙන් දැනුවත් කරලීම සඳහාය.

මෙම වැඩමුළුව පවත්වන ස්ථානය පිළිබඳව රහසක් සේ තබා ගැනීමට එම සංගමයේ සභාපතිවරයා වන ප්‍රෙඩී ගමගේ මහතා කටයුතු කර ඇත්තේ මෙවැනි කඩාකප්පල්කාරී ක්‍රියාවක් සිදුවෙතැයි යන සැකය නිසාය.

නමුත් ප්‍රෙඩීට අමතරව TID නිලධාරීන්ද එම ස්ථානය පිළිබඳව කලින් දැන සිට ඇත.

අද උදෑසන ප්‍රෙඩී ගමගේ මහතා අමතා ඇති TID නිලධාරියෙකු පවසා ඇත්තේ වැඩමුළුව පවත්වන හෝටලය වටකොට උද්ඝෝෂණය කිරීමේ සැලැස්මක් ජාතික සමගිය ගොඩ නැගීමේ සංගමය විසින් ක්‍රියාත්මක කිරීමට නියමිත ව තිබූ බවයි.

අදාල තත්ත්වය හේතුවෙන් වැඩමුළුවට සහභාගිවන අයගේ ආරක්ෂාව පිළිබඳව පොලීසියට වගකිව නොහැකි බව පවසා ඇත.

මෙම ජාතික සමගිය ගොඩ නැගීමේ සංගමය සමන්විත වන්නේ විශ්‍රාමික හමුදා නිලධාරීන් හා ආබාධිත සොල්දාදුවන්ගෙනි.

ක්‍රියාන්විත රාජකාරියේ යෙදී සිටියදී අතුරුදන්වූ හමුදා භටයන්ගේ පවුල්වල අයගේ සහායද මෙම සංවිධානයට ලැබී ඇත.

අද උදෑසන ප්‍රෙඩී ගමගේ මහතා අමතා ඇති ‘රානි බීච් රිසෝට්' හෝටලයේ පාලනාධිකාරිය පවසා ඇත්තේ අද උදෑසන සිට හෝටලයේ දුරකතනයට විවිධ පුද්ගලයන් ඇමතුම් ලබාදෙමින් තර්ජන එල්ල කරන බැවින් වැඩමුළුව පැවැත්වීමට ඉඩ ලබාදිය නොහැකි බවයි.

මේ වන විට මීගමුව කරා පැමිණ සිටින වැඩමුළුවේ ආරාධිතයන් විවිධ ස්ථානවල රැදී සිටී.

ඔවුන් පිළිබඳව ඔත්තු බැලීම සඳහා ආරක්ෂක අංශවලට සම්බන්ධ පුද්ගලයන් රාශියක් යොදවා ඇති බව වාර්තා වේ.

(මූලාශ්‍රය srilankamirror.com)