මෙවැනි ආහාර වල ඇති සීනි වැනි ද්‍රව්‍ය වල ප‍්‍රමාණයන් නිර්ණය කිරීම පිළිබඳව මෙන්ම ශරිරයට අහිතකර ප‍්‍රමාණයන් එහි අන්තර්ගතව තිබේ නම් ඒ පිළිබඳව නීති මගින් කටයුතු කිරීමටත් දැනට තිබෙන නීති ප‍්‍රමාණවත් නොවේ නම් නව නිති ගෙන ඒමටද බලාපොරොත්තු වන බව ඔහු පවසයි.
ආහාර නිෂ්පාදන සමාගම් මුදල් සහ ලාභය කෙරෙහි වැඩි අවධානයක් යොමු කිරීම මත මෙවැනි තත්ත්වයක් උදා වී ඇති බවත් එය වෙනස් කිරීම සඳහා වු වැඩසටහනක අමාත්‍යාංශය යෙදී සිටින බවත් අමාත්‍යවරයා පවසා සිටියේය.
අද (24) මහනුවරට පැමිණ පළමුව රාමඤ්ඤ නිකායේ මහානායක අතිපුජ්‍ය නාපානේ පේමසිරි හිමියන් ද ඉන්පසු මල්වතු පාර්ශ්වයේ මහානායක අතිපුජ්‍ය තිබ්බටුවාවේ ශ්‍රී සුමංගල හිමියන්ද බැහැදකිමින් සෞඛ්‍ය අමාත්‍යාංශය මගින් සම්පාදිත සෞඛ්‍ය සම්පන්න ආහාර රටාවක් නමින් යුතු භික්ෂුන් වහන්සේලා සඳහා වු ආහාර වටිටෝරුවක් පිළිගැන්වීමෙන් අනතුරුව මාධ්‍ය වෙත අදහස් දක්වමින් ඔහු මේ බව පැවසීය.
එහිදී අමාත්‍යවරයා සඳහන් කළේ සෞඛ්‍ය අමාත්‍යාංශය මගින් මීට පෙර මහසංඝරත්නය සඳහා සුදුසු දැහැත් වටිටියක් නිර්මාණය කර පිළිගැන්වු බවත් ඊට අමතරව අදදින මහාසංඝරත්නයේ සෞඛ්‍ය හා යහපත් දිවිය සඳහා වු මෙම ආහාර වට්ටෝරුව පිළිගැන්වු බවත්ය.මෙම ආහාර වට්ටෝරුව අද දින දිවයිනේ සැම විහාරස්ථානයකට තැපැල් මගින් යැවීමට කටයුතු කරන බවද අමාත්‍යවරයා කියා සිටියේය.
ඉදිරියේදී මෙය මහජනතාවගේද දැනගැනිම සඳහා මාධ්‍ය හරහා මෙන්ම වෙනත් මාර්ග වලින් දැනුවත් කරන බව ද හෙතෙම පැවසුවේය
අමාත්‍යවරයා අමතමින් මල්වතු මහානායක හිමියන් සඳහන් කළේ මහසංඝරත්නයේ මෙන්ම ජනතාවගේ සෞඛ්‍ය තත්ත්වය පිළිබඳව ද අවධානය යොමු කරමින් ශරීර සෞඛ්‍යට අහිතකර නොවන ආහාර ලබාගැනීම කෙරෙහි ජනතාවගේ අවධානය යොමු කිරිම වැදගත් බවයි.
