අමාත්‍යවරයා මේ බව සඳහන් කළේ කොබෙයිගනේ ප්‍රාදේශීය ලේකම් කාර්යාලයේ පැවති “ප්‍රජා ශක්ති” වැඩසටහන පිළිබඳ දැනුවත් කිරීමේ හමුවකට එක්වෙමිනි.

අර්ධ වශයෙන් හානි වූ නිවාස 120,000කට අධික ප්‍රමාණයක් පවතින බැවින්, ඒ සඳහා සවිස්තරාත්මක තක්සේරු කිරීම් සිදු කිරීමට වසරකට ආසන්න කාලයක් ගත විය හැකි බව අමාත්‍යවරයා පෙන්වා දුන්නේය. විධිමත් තක්සේරු කිරීම් හරහා සහන සැලසීමේදී සිදුවන ප්‍රමාදය මග හරවා ජනතාවට කඩිනමින් සහන සැලසීම රජයේ අරමුණයි.

“විධිමත් තක්සේරුවක් සිදු කිරීමට ගියහොත් පීඩාවට පත් ජනතාවට සහන ලැබීම වසරකින් පමණ ප්‍රමාද විය හැකියි. එබැවින් කාලෝචිත ලෙස සහන සැලසීම සහතික කිරීම සඳහා තක්සේරු කිරීමකින් තොරව පීඩාවට පත් සෑම නිවසකටම රුපියල් 500,000 ක ස්ථාවර මුදලක් ලබා දීමට රජය තීරණය කර තිබෙනවා,” යැයි අමාත්‍යවරයා වැඩිදුරටත් පැවසීය.

තක්සේරු කිරීමකින් තොරව ලබාදෙන මෙම ලක්ෂ පහේ මුදලට වඩා වැඩි හානියක් සිදුව ඇති බව සලකන නිවාස හිමියන්ට මෙම ක්‍රමයෙන් බැහැරව විධිමත් හානි තක්සේරුවකට යොමු විය හැකි බවද අමාත්‍යවරයා පැහැදිලි කළේය.

ඊට අනුව, නිසි තක්සේරු කිරීමකින් අනතුරුව හානියේ සම්පූර්ණ වටිනාකම මත වන්දි මුදල් පිරිනමනු ලැබේ. යම් නිවසක හානිය රුපියල් මිලියන 2.5ක් හෝ මිලියන 5ක් ලෙස තක්සේරු කරන්නේ නම්, එම සම්පූර්ණ මුදලම ලබා දීමට රජය සූදානම්ය.

පූර්ණ හෝ අර්ධ වශයෙන් හානියට පත් නිවාස හිමියන්ට සහන සැලසීමේ අරමුණින්, විධිමත් චක්‍රලේඛ නිකුත් කිරීමටත් පෙර මූලික මූල්‍ය ආධාර ලබා දීමට රජය දැනටමත් පියවර ගෙන ඇති බවද මෙහිදී අවධාරණය කෙරිණි.