මෙවර ඌව මැතිවරණ ප්‍රතිඵල විශ්ලේෂණයට ලක් කරමින් ඔහු පැවසුවේ ඌව මැතිවරණ ප්‍රතිඵල මගින් ඉදිරි ජනාධිපතිවරණයකදී ආණ්ඩුව පරාජයට පත් වීම හෝ විපක්ෂය ජය ගන්නා බවක් පෙන්නුම් නොකරන බවයි.
ඌව මැතිවරණ ප්‍රතිඵලයෙන් පෙන්නුම් කරන්නේ ආණ්ඩුවේ පවුල්වාදී, ජාතිවාදී, යුධවාදී දේශපාලන සංස්කෘතිය හා මතවාදය ග්‍රාමීය බෞද්ධ ජනතාව අතරත් බොහෝ දුරට ප්‍රතික්ෂේප වී ඇති බව යැයි ආචාර්ය දයාන් ජයතිලක මහතා පැවසුවේය.
මහින්ද 'අයියා'
‘ආණ්ඩුව යුද්ධයෙන් පස්සේ පාවිච්චි කරපු දේශපාලන සංස්කෘතිය මුලින්ම පරාජය වුණේ ජිනීවා වල තුන් සැරයක්, ඊළඟට පරාජය වුණේ උතුරු පළාත් සභාවේ, දැන් සිංහල බෞද්ධ බහුතරයක් ඉන්න ප්‍රදේශයක එය සහමුලින්ම නොවුනත් විශාල වශයෙන් පසුබෑමකට ලක් වෙලා තියෙනවා’ යනුවෙන් ඔහු ප්‍රකාශ කළේය.
‘ශ්‍රී ලංකා නිදහස් පක්ෂයේ කවුරු හරි ක්‍රියාශීලී ජ්‍යෙෂ්ඨයෙක් අගමැති කරලා, සමස්ත නිදහස් පක්ෂය ආපහු තමන්ගේ පැත්තට අරගෙන මහ රජාගේ ඉඳන් ආපහු මහින්ද අයියා බවට පත් වෙනවද කියලා තෝරා ගැනීමක් ජනාධිපතිතුමාට තියෙනවා" යැයි දයාන් ජයතිලක මහතා වැඩි දුරටත් පැවසීය.
පසුගිය මැතිවරණ වල මෙන් නොව ඉදිරි මැතිවරණවලදී ජනාධිපතිවරයාට රට අභ්‍යන්තරයෙන් මෙන්ම බාහිරින්ද අභියෝගයක් එල්ල වෙනු ඇති බවද ආචාර්ය දයාන් ජයතිලක මහතා කියා සිටියේය.
ඌවේ ප්‍රතිඵලය අනුව ජනාධිපතිවරණය පැහැදිලිවම මහින්ද රාජපක්ෂ ජනාධිපතිවරයාට ජය ගත හැකි බව පැවසූ ආචාර්යවරයා, එයට හේතුව වශයෙන් කියා සිටියේ ඌව මැතිවරණයේ හරීන් ප්‍රනාන්දු සතුව තිබූ ජනප්‍රියත්වය ජනාධිපති අපේක්ෂක රනිල් වික්‍රමසිංහ මහතාට නොමැති වීම බවයි.
(බීබීසී සංදේශය)
