ආණ්ඩුක්‍රම ව්‍යවස්ථාවට අනුව තමන් තුන්වැනි වරට ජනාධිපතිවරණය සඳහා ඉදිරිපත් වීමේ නීත්‍යනුකූලභාවය පිළිබඳව අදහස් විමසීමක් ජනාධිපතිවරයා අධිකරණ ක්ෂේත්‍රයේ ඉහළම ආයතනයකින් සිදුකර තිබේ.මීට අදාළ අදහස් විමසීම පසුගිය දහවැනිදා ජනාධිපතිවරයා යොමුකර ඇති අතර, අදාළ අධිකරණයෙන් මේ වන විට එම විමසීමට ප්‍රතිචාර දක්වා ඇතැයි හෙළිදරව් වෙයි.
අදාළ ප්‍රතිචාරයට අනුව ජනාධිපතිවරයා මීළඟ ජනාධිපතිවරණයට ඉදිරිපත්වීමට සූදානම් වන අතර, එය ලබන ජනවාරි මස මුල් සතියේ පැවැත්වීමට සැලැසුම් කර ඇත.
මේ අතර දහ අටවැනි ව්‍යවස්ථා සංශෝධනයට අනුව ජනාධිපතිවරයාට තුන්වැනි වර ජනාධිපතිවරණයට ඉදිරිපත් විය නොහැකි බවත්, මහින්ද රාජපක්ෂ මහතා දෙවැනි වර ජනාධිපති ධුරයේ දිවුරුම් දී ඇත්තේ දහඅටවැනි ව්‍යවස්ථා සංශෝධනය සම්මත කිරීමට පෙර වීම මීට හේතුව බවත් පවසන හිටපු අගවිනිසුරු සරත් එන්. සිල්වා මහතා මහින්ද රාජපක්ෂ මහතා තුන්වැනි වර ජනාධිපතිවරණයට ඉදිරිපත් වීමට එරෙහිව නඩු දැමීමට සැලැසුම් කර ඇත.
ජනාධිපතිවරයා අධිකරණ ක්ෂේත්‍රයේ අදාළ ආයතනයෙන් කළ අදහස් විමසීම සහ ඊට ලැබී ඇති ප්‍රතිචාරය මේ නඩුවට බලපෑමක් එල්ල නොකරන අතර, ඊට අදාළ ලියකියවිලි මේ වන විට සකස් කර අවසන් බවද අනාවරණය වෙයි.
(මව්බිම)
