නව චක්‍ර ලේඛනයට අනුව මෙතෙක් ප්‍රාදේශීය ලේකම් කාර්යාල හරහා සිදුකළ විශ්‍රාම වැටුප් ගෙවීම ඍජුවම බැංකු හරහා ගෙවීමෙන් මෙම ගැටලුව උද්ගත වී ඇත.
අප කළ විමසීමක දී විශ්‍රාම වැටුප් අධ්‍යක්ෂ ජනරාල් සුනිල් හෙට්ටිආරච්චි මහතා ප්‍රකාශ කළේ, දෙපාර්තමේන්තුවෙන් සැප්තැම්බර් 07 දිනය වන විට මුදල් බැංකුවලට බැර කර තිබූ බවත් පහළ නිලධාරීන් විසින් වැරදි තොරතුරු ඇතුළත් කිරීම නිසා තුන්දහසකට ආසන්න පිරිසකට විශ්‍රාම වැටුප් ගෙවා ගත නොහැකි වූ බවත් ය.
රට පුරා රාජ්‍ය ආයතන ඉතා දූෂිත තත්ත්වයක පවතින බවත් මෙම අසාර්ථකත්වයට ද හේතුව එම වැරදි පරිපාලනය බවත් ඒ මහතා පැවසූ අතර නව චක්‍ර ලේඛය නිකුත් කළේ ද එම අකාර්යක්ෂමතාව වළක්වා ගැනීමට බවද ප්‍රකාශ කළේ ය.
රාජ්‍ය, අර්ධ රාජ්‍ය හා පෞද්ගලික වෘත්තීය සමිති එකමුතුවේ කැඳවුම්කරු ජෝසප් ස්ටාලින් මහතා ප්‍රකාශ කළේ මෙතෙක් කාර්යාල 28කින් සිදුකළ කටයුත්ත එක් කාර්යාලයකින් සිදුකරන්නට යෑම නිසා ලක්ෂ පහක පමණ විශ්‍රාමිකයන් අපහසුතාවයට පත්වන බවත් වංචා සිදුවන්නේ නම් ඊට අදාළ ක්‍රියාමාර්ග ගෙන වංචා අවම කර ගැනීම විනා මෙවැනි අසාර්ථක උත්සාහයක් ගැනීම නොවන බවත් රාජ්‍ය කළමනාකරණයේ දුර්වලතාව විශ්‍රාම වැටුප් අධ්‍යක්ෂ ජනරාල්වරයාගේ ප්‍රකාශවලින්ම පැහැදිලි වන බවත් ය.
