විශ්වවිද්‍යාල ප්‍රවේශය සඳහා අයදුම්පත් කැඳවීම ආරම්භ කළ ද සිසුන් ඇතුළත් කිරීම වර්ජනය අවසන් වන තෙක් කල් යාම නොවැළැක්විය හැකි බව එහි උසස් නිලධාරියෙක් සඳහන් කළේය.
ලැබෙන අයදුම්පත් තේරීම සඳහා ප්‍රතිපාදන කොමිෂන් සභාවේ කාර්ය මණ්ඩලය නොමැති හෙයින් වර්ජනය අවසන් වුව ද අයදුම්පත් තෝරා ගැනීමේ කටයුතු සඳහා අමතර කාලයක් ගතවන බවත් එම නිලධාරියා කීවේය.
එමෙන්ම විශ්වවිද්‍යාල ප්‍රවේශය තීරණය කෙරෙන ඉසෙඩ් ලකුණු නිකුත් කිරීමට තවත් කාලයක් ගත වන හෙයින් වර්ජනයේ බලපෑම සුළුපටු නොවන බවත් හෙතෙම කීවේය.
විශ්වවිද්‍යාල ආචාර්යවරුන් මාර්ගගත ක්‍රමයට අධ්‍යයන කටයුතු කරගෙන යන නමුත් ප්‍රායෝගික පරීක්ෂණ සහ විභාග පැවැත්වීමට සිසුන් අනිවාර්යයෙන්ම විශ්වවිද්‍යාවලට කැඳවිය යුතු ය. වර්ජනය අවසන් වන තෙක් එලෙස සිසුන් කැඳවීමට නොහැකි වීම ද බරපතළ ගැටලුවකි.
එමෙන්ම සිසුන්ගේ මහපොළ හා ශිෂ්‍යාධාර වාරික ගෙවීම ද මේ වන විට නතර වී තිබේ. විශ්වවිද්‍යාලවල අධ්‍යයන හා පරිපාලන කටයුතු සිදු නොවන හෙයින් එදිනෙදා අවශ්‍ය මුදල් පවා මහාභාණ්ඩාගාරයෙන් නිදහස් නොකෙරෙන බවත් ඉහත කරුණු දැක්වූ නිලධාරියා කීවේය.
අනධ්‍යයන කාර්ය මණ්ඩලය ද අවසන් වරට වැටුප් ලබා ගෙන ඇත්තේ අප්‍රේල් මස 10 වැනිදා ය. එදින සිට මේ දක්වා ඔවුන්ට ද වැටුප් නොලැබීම බරපතළ ගැටලුවක් වී තිබේ. කෙසේ වුව ද සිය ඉල්ලීම ඉටු වන තෙක් වර්ජනය අත් නොහැරීමට වෘත්තීය සමිති ඒකාබද්ධ කමිටුව තීරණය කර තිබේ.
