දැඩි නියඟය පවත්නා සැප්තැම්බර් මාසය තුළ යාල ජාතික වනෝද්‍යානය වසා දැමීම වාර්ෂිකව සිදුකෙරේ.
ඔක්‌තෝබර් මාසයේ ලැබීමට නියමිත මෝසම් වැසි පමා වුවහොත් යාල වනෝද්‍යානය වසා දැමීමේ කාලය තවත් දීර්ඝ කිරීමට සිදුවනු ඇතැයි ද රත්නායක මහතා පැවැසුවේය.
වනෝද්‍යානය තුළ සිටින සතුන් ආහාර හා ජලය සොයා මේ කාලයේ සංක්‍රමණය වන අතර සතුන්ගේ එම චර්යා රටාවට බාධා සිදුවන හෙයින් සැප්තැම්බර් මාසය පුරා යාල ජාතික වනෝද්‍යානය වසා තබනු ඇත.
සංචාරකයන් වැඩි වශයෙන් යාල වනෝද්‍යානයට පැමිණීමෙන් විශාල ආදායමක්‌ ලැබෙන නමුත් ඊට වඩා සතුන්ගේ පැවැත්මට ප්‍රමුඛතාව ලබාදිය යුතු බැවින් මෙම කාලයේ යාල ජාතික වනෝද්‍යානය වසා දැමෙන බව අධ්‍යක්‍ෂ ජනරාල්වරයා සඳහන් කළේය.
මේ කාලයේ සතුන් ජලය සොයා එළිමහනට පැමිණෙන බැවින් දඩයක්‌කරුවන්ගේ ග්‍රහණයෙන් සතුන් ආරක්‌ෂා කර ගැනීම සඳහා ජංගම ආරක්‌ෂක සේවා දැඩි කර ඇතැයිද හෙතෙම වැඩිදුරටත් සඳහන් කළේය.
